Бу күннэргэ Исландияҕа олорор, Мэҥэ Хаҥалас улууһун Бүтэйдээҕиттэн төрүттээх Александра Аргунова-Күөрэгэй туһунан тахсыахтаах кинигэни суруйар айар бөлөх Бүтэйдээх олохтоохторун кытта көрүстүлэр.
edersaas.ru
Бу туһунан нэһилиэк кыраайы үөрэтэр түмэлин дириэктэрэ Константин Родионов кэпсиир:
— М.К. Аммосов аатынан ХИФУ преподавателлэрэ Розалия Герасимова, Галина Соломонова, Александра Алексеева, Михаил Иванов Исландияҕа сылдьан, Күөрэгэйдиин көрсөн баран, итинник үтүө дьыалаҕа ылсарга санаммыттар.
Ыалдьыттар мусуой комплексыгар сырыттылар, Мэҥэ Богородскай Таҥаратын дьиэтин кэрэхсии көрдүлэр.
Кыраайы үөрэтэр мусуой архыыбыгар, «Исландия дьиэтэ» экспозиционнай эбийиэккэ, оскуола техническэй киинигэр үлэлээтилэр.
Күөрэгэй бииргэ төрөөбүт убайын Прокопий Аргунов дьиэ кэргэнин көрсөн, иһирэхтик кэпсэтэн, бэрт элбэҕи эбии биллилэр.
Оскуолаҕа үлэлииллэригэр саҥа дириэктэр Михаил Нестеров бастакы үлэтин күнүгэр түбэһэн, бииргэ үлэлииргэ кэпсэтии ыыттылар.
Кинигэ ааптардара Бүтэйдээх баай историятыттан элбэҕи билбиттэригэр, сэлиэнньэ тас көстүүтүн, үлэ күөстүү оргуйарын илэ көрөн сөхпүттэрин, дьоммут-сэргэбит ыалдьытымсаҕын биһирээбиттэрин билинэн, мусуой Махтал кинигэтигэр суруйан хааллардылар.
Дьэ, онон биһиги, бүтэйдээхтэр, мантан инньэ Күөрэгэйбитин үйэтитэр кэлэр көлүөнэҕэ кэһии кинигэни кэтэһэбит. Биһиги биллиилээх биир дойдулаахпыт туһунан киэҥ араҥаҕа билиһиннэриэн баҕалаах дьоһун дьоҥҥо айар үлэлэригэр ситиһиини баҕарабыт.
Ити курдук, Ийэ дойдуга бэриниилээх буолуу сылыгар ыччаты кытта үлэлэһэр дьон кэскиллээх үлэҕэ ылыстылар.
Елена ПОТОЦКАЯ, «Саха сирэ» хаһыат, edersaas.ru