Александр Жирков спикер солотуттан тоҕо аккаастаммытын быһаарда
Алтыс ыҥырыылаах Ил Түмэн бастакы пленарнай мунньаҕар Судаарыстыбаннай Мунньах Бэрэссэдээтэлин бастакы солбуйааччытын дуоһунаһыгар ааспыт ыҥырыыга спикердээбит Александр Жирков кандидатурата туруорулунна.
Тыл бэриллибитигэр Александр Николаевич доруобуйатын туругунан эпэрээссийэҕэ барыахтааҕын, салгыы уһуннук эмтэниэхтээҕин, инньэ гынан Айсен Николаевы уонна дьиэ кэргэнин кытары сүбэлэһэн баран, саҥа ыҥырыыга спикердииртэн аккаастанарга быһаарыммытын эттэ. Ол эрээри ылыммыт суолбуттан туоруур санаам суох, быыбардааччыларым итэҕэлин толорор туһугар кыаҕым баарынан үлэлиэм, биир идэлээхтэрим итэҕэйэр буоллахтарына, Судаарыстыбаннай Мунньах Бэрэссэдээтэлин бастакы солбуйааччытынан үлэлииргэ бэлэммин диэтэ. Кини салалтатынан бэһис ыҥырыылаах Ил Түмэн таһаарыылаахтык үлэлээбитин, 2 тыһ. тахса нуормаламмыт аакталары, ол иһигэр 824 сокуону ылыммытын, федеральнай таһымҥа 34 сокуон барылын киллэрбититтэн сэттэтэ бигэргэммитин норуот дьокутааттара үрдүктүк сыаналаатылар. Спикери бастакы солбуйааччынан 58 куолаһынан таллылар. Бэһис ыҥырыылаах Ил Түмэн үлэтин, тутуспут тосхолун салгыы сайыннарарга бэлэмнэрин онон биллэрдилэр.
Спикери солбуйааччы солотун Виктор Губаревка уонна Антонина Григорьеваҕа итэҕэйдилэр.
Раиса Сибирякова, edersaas.ru