Александр Уаров: «Силиэстийэ кэмигэр дьиэбэр олоруом, ханна куотуохпунуй..?»

70  саастаах Ил Түмэн дьокутаата Александр Уаровы суут саалатыттан босхолоотулар. Судьуйа хааччахтыыр миэрэ быһыытынан бэс ыйын 25 күнүгэр диэри дьиэтээҕи хаайыыга уурда. 

«Кими даҕаны ыххайыам суоҕа. Ханна куотуохпунуй? Атаҕым ыалдьар. 2017 сыллаахха сүрэҕим акаастаан, быраастар нэһиилэ анаараа дойдуттан төнүннэрбиттэрэ. Силиэстийэ кэмигэр дьиэбэр олоруом, суут ирдэбилин барытын толоруом. Өрөспүүбүлүкэ таһыгар бас билиим суох«, — диэбит Уаров суукка.

Санатан эттэххэ, дьокутааттар бөдөҥ кээмэйдээх бэриги ылыыга уорбаланаллар. Холуобунай дьыаланы РФ Силиэстийэлиир кэмитиэтин Саха сиринээҕи управлениетын салайааччыта Александр Заболиченко тэрийбитэ. Бэрик кээмэйэ, силиэстийэ дааннайынан, 400 000 солк.

Дьыала СӨ ИДь-тын Экономическай куттал суох буолуутун уонна хоруупсуйаны утары үлэҕэ управлениетыттан уонна Саха сирин борокуратууратыттан киирбит бэрэбиэркэлэр матырыйаалларыгар олоҕуран тэриллибитэ.

Бэйэбит корр., edersaas.ru