Инникибин ыйа куруук
Сайа охсор сааскы тыалтан
Санаам иэйэн дууһам ыллыыр,
Сайдар – тупсар саҥа ыалтан
Сүрүм – кутум сайдам тыллыыр…
Өтөн үөтэр, кэҕэ этэр,
Өйдөөн истэр бары үөрэр…
Мас – от күөх таҥаһын кэтэр,
Модун трактор сири түөрэр…
Оҕо күлэр, олох устар,
Оонньуу – күлэ ыччат мустар…
Үөһээнэн ааһаллар кустар,
Үргүүк тыал сиһиктиин тустар.
Төрүт дойдум киһи буолар
Төлкөбүн олох суолугар
Илдьэр ийэ, аҕа курдук
Инникибин ыйа куруук.
Сааскы түүн
Үрүҥ күммүт тахсыыта
Үүннэ үтүө сарсыарда,
Араас чыычаах ырыата
Абылыырдыы чуопчаарда…
Сааһар саллыы тыастара
Сата баһын аймаата,
Дьылҕа хааммыт ыйааҕа
Дьыбарсыйан аастаҕа…
Байанайбыт биэрбитин
Булчут ылар үгэһин
Тутуһабыт мэлдьитин,
Умнабыт кэскилбитин…
Кэҕэ кыыл чоргуйда…
Саас кэллэ, саас кэллэ,
Сир ирдэ, күн күллэ,
Сис былыт халыйда,
Сирэм күөх налыйда…
Саас кэллэ, саас кэллэ,
Сир ирдэ, күн күллэ,
Үөн – көйүүр тилиннэ,
Үөр хааспыт билиннэ…
Саас кэллэ, саас кэллэ,
Сир ирдэ, күн күллэ,
Күөл мууһа уһунна,
Кус үөрэ муһунна…
Саас кэллэ, саас кэллэ,
Сир ирдэ, күн күллэ,
Күүс үлэ оргуйда,
Кэҕэ кыыл чоргуйда…
Саас
Күндү күммүт
Күлэн үөрэн,
Кэрэ сааспыт
Кэллэ тиийэн…
Үөрбүт – көппүт
Үөр чыычаахпыт
Көтө – дайа
Көрүлээтэ…
Күнү быһа
Кэрии тыаҕа
Кэрээбэккэ
Кэҕэ эттэ…
Ырыа – тойук
Ыпсыыланна,
Үлэ – хамнас
Үмүрүйдэ!
Кулун тутар…
Силлиэбит
Сирилээтэ,
Ыраас хаарбыт
Ытылынна,
Тэлгэһэбит
Тибилиннэ…
Кулун ааҕар
Кулун тутар
Ыйбыт буолла:
Ыалбыт суола
Көстө сүттэ,
Көмнөх түстэ…
Кубааскайдаах,
Кубулҕаттаах
Кулун тутар
Кубулдьутар:
Күнүн – ыйын
Күн аайыытын!
2021
Үрэхпит уута харылыы устар…
Имик – симик чүмэчи уотугар
Суруйар бөрүөм сурдурҕаччы.
Ырыа хоһоон тылларыгар
Ылларан оргууй сырылаччы…
Оо, түүммүт ыраатта да быһыылаах,
Арай хоһум түннүгэ миэнэ
Кыракый тоһоҕос чүмэчилээх
Дьиримнии оонньуур чуумпу түүҥҥэ…
Чараҥым намылыйар хатыҥнара
Сааскы сарыал түүҥҥэ нуктаатылар,
Туохтан эрэ кыыһыран омуннура
Үрэхпит уута харылыы устар
01.05.1966 сыл
Сааскы хаар
Түү хаар үөһээттэн
Түһэр тэлээрэн
Сымнаҕастык,
Сып – сылаастык
Сылаанньыта,
Саймаарыта
Саныыр санаабын,
Сырдык ырабын.
Түү хаар үөһээттэн
Түһэр тэлээрэн
Тэтимнээхтик,
Тиэтэтэрдик
Өрө күүрдэ
Өрүкүтэ
Өйбүн – санаабын,
Өспөт тапталбын…
Саастаах киһиэхэ
Сааскы хаар миэхэ
Сахам кэриэтэ
Сап – сайаҕас,
Күн ийэм тэҥэ
Күндү, уйаҕас…
Александр Тарасов, Горнай