Суруналыыс Дмитрий Аргунов олохтоох тэлэбиидэнньэҕэ “ФакторZ” биэриитигэр Хотугулуу-Илиҥҥи федеральнай университет устудьуоннарын Идэлээх сойууһун бастакы сүһүөҕүн салайааччыта, “Эдэр гвардия” салайааччыта Александр Румянцевы кытта интервьюта таҕыста.
— Арассыыйатааҕы “Эдэр гвардия” салайааччыта А.В.Демидов ДНӨ көмөҕө барарга волонтердары ыҥыртаабыта. Уһук Илин уокуруктан 15, Саха сириттэн 6 буолан, муус устар бүтүүтэ Москваҕа көппүппүт. Сарсыныгар тута оптуобуска олорон, Мариуполь куоракка диэри балтараа суукка курдук айаннаан тиийбиппит. Оччолорго анал дьайыы бара турар буолан кутталлаах этэ. Биһиги Никольскай (Володарскай) бөһүөлэккэ олорбуппут. Куораттан 10-ча килэмиэтирдээх сир. “Азовсталь” собуоту дэлби тэптэрэллэрин истэрбит, буомба хайдах көтөрүн илэ харахпытынан көрбүппүт. “Азовсталь” собуот кыра буолбатах, иэнинэн ыллахха, Дьокуускай куораты кытта араа-бараа буолуо. Биһиги сорукпут — олохтоохторго көмөлөһүү. Иһэр уу, куруппалары, кэнсиэрбэлэри, оҕолорго минньигэс илдьэрбит, түҥэтэрбит. Дьон олус уустук усулуобуйаҕа олороллорун дьиксинэ көрбүппүт. Биһиги бэйэбит баҕабытынан тиийбиппит. Волонтердар ботуччу хамнаһы аахсаллар дииллэр. Оннук буолбатах. Биир дойдулаахтарбытыгар көмөлөһөр ытык иэспит, — диэн Александр быһаарар.
Олохтоохтор геополитикаҕа эҥин быһаарса барбакка, ВСУ дьоно анал байыаннайдар буолбатахтарын, сэп-сэбиргэл туппут көннөрү дьон, бандьыыттар буолалларын, уопсайынан, кинилэр өттүлэриттэн тылынан этиллибэт куһаҕан быһыылары көрсүбүттэрин кэпсииллэр эбит. Эдэр дьон ким даҕаны күһэйбэтэҕин үрдүнэн, бэйэлэрин баҕаларынан, босхо көмөҕө тылланан тиийэн сүрүн соруктарын толорон, этэҥҥэ эргиллэн кэлбиттэр.
“Саха сирэ” хаһыат, edersaas.ru
Хаартыска: СИА.