Бэҕэһээ, кулун тутар 29 күнүгэр, киэһэ хойут Дьокуускай куорат Промышленнай уокуругун салайааччыта Александр Подголовка холуобунай дьыала тэриллибитин туһунан сурах тарҕанан саҕалаабыта.
Вера МАКАРОВА, «Саха сирэ» хаһыат, edersaas.ru
«Сурах» диибин. Тоҕо диэтэр, быраабы араҥаччылыыр уорганнар официальнай сайтарыгар иһитиннэрэ-биллэрэ иликтэринэ, бигэргэтиллэ илик сонун сурах эрэ буолар.
Сурах маннык:
Ис дьыала уорганнарын (ол эбэтэр, полиция) силиэдэбэтэллэрэ кулун тутар 28 күнүгэр Александр Подголовка РФ Холуобунай кодексатын 285-с ыстатыйатынан дьыала тэрийбиттэр. Ол эбэтэр, дуоһунас боломуочуйатынан туһаныы бэлиэтэ баарынан.
Туохха уорбалаабыттарый? Номнуо хас да биэрсийэ баар, ол: суут уурааҕынан көннөрүнэр үлэҕэ ууруллубут хаайыылааҕы Промышленнай уокурук управатыгар үлэлэтэ ыыппыттар. Онуоха толоруллубут үлэ сымыйанан таабылламмыт. Дьиҥэр, буруйданааччы үлэлээбэтэх, ол оннугар уокурукка оҥоһуллубут араас өҥөлөрү, ол иһигэр, тиэхиньикэни өрөмүөннээһини, бэйэтин хармааныттан төлөөбүт.
Силиэдэбэтэллэр дьыалаҕа сыһыаннаах буолуон сөптөөх докумуоннары үөрэтэллэр, туоһулартан көрдөрүү ылаллар. Билигин Подголовка силиэстийэ кэмигэр хааччахтыыр миэрэ быһыытынан, ханнык миэрэ туттуллуоҕун суут быһаарарын күүтэллэр.
Маныаха «Аартык.ру» сайт кинини номнуо Силиэстийэлиир изоляторга (СИЗО-га) хаайбыттарын туһунан суруйбут. Ити — оруна суох: СИЗО-ҕа суут уурааҕынан эрэ киллэрэллэр, оттон буруйу оҥорууга уорбаланан тутуллубут киһини 48 чааска полиция отделыгар баар дьону быстах кэмҥэ хаайар изоляторга (ИВС) угаллар.
Иккис биэрсийэ быһыытынан, бүддьүөт харчытын атын сыалга туттубут, сымыйа докумуоннары оҥорбут диэн. Управаҕа «өлбүт дууһалар» суруллан, өҥөлөр сымыйа докумуоннарга олоҕуран төлөммүттэр диэн.
Уонна үһүс сабаҕалааһын быһыытынан, бу дьыаланы тэрийии балаҕан ыйыгар ыытыллыахтаах Дьокуускай куорат баһылыгын быыбарыгар сыһыаннаах буолуон сөп — билиҥҥи мэр хамаандатын дьонуттан биирдиилээн сууһарыы саҕаланна диэн…
Дьокуускай куорат полициятын пресс-сулууспата:
— Кулун тутар 28 күнүгэр Дьокуускай куорат полициятын Силиэстийэлиир управлениета Дьокуускай куорат управаларын биирдэстэрин начаалынньыгын эбээһинэһин толорооччуга РФ Холуобунай кодексатын 285-с ыст. 1 чааһынан холуобунай дьыала тэрийдэ.
СӨ ИДьМ-тын Экономическай буруйдары уонна хоруупсуйаны утары управлениетын сотрудниктара киирбит иһитиннэриини бэрэбиэркэлээһин кэмигэр, бу дуоһунастаах киһи дуоһунас боломуочуйатынан туһаныыга сыһыаннааҕын быһаарбыттар.
Барыллааһын силиэстийэ быһаарбытынан, бу дьыл олунньу ыйыгар уорбаланааччы П. управа начаалынньыгын эбээһинэһин толорор кэмигэр, үлэлиир кэбиниэтигэр буруйун боруостааччыга этии киллэрбит — суут уурааҕынан 200 чаас булгуччулаах үлэҕэ ууруллубут хаайыылааҕы үлэтин өҥөнөн солбуйарга эппит. Ол эбэтэр, бэйэтин харчытынан управаҕа кулер уонна тутуу матырыйаалларын атыыластаҕына, үлэлээбитин курдук сымыйа таабыл суруйан биэриэх буолбут.
Ити дьайыытынан, хаайыылаах суут анаабыт накаастабыл миэрэтин толорботоҕор тиэрдибит, холуобунай иниспиэксийэҕэ буруйун боруостааччы 200 чаас үлэлээбитин курдук сымыйа докумуоннар барбыттар.
Итинник хас да чахчы баарын силиэстийэ бигэргэтэр.
Холуобунай дьыала чэрчитинэн, уорбаланааччы дьиэтигэр уонна үлэтигэр дьэҥдьиир ыытыллыбыт. Кулун тутар 29 күнүгэр РФ Холуобунай-процессуальнай кодексатын 91-с ыстатыйатын ирдэбилинэн, уорбаланааччы дьону быстах тутар изоляторга (ИВС) хаайыллыбыт.
Санатар буоллахха, Александр Подголов тула 2013 сыллаахха эмиэ айдаан тахса сылдьыбыта. Онно кини 1992 сыллаахха «инженер-электрик» идэтин ылбыт дьупулуома сокуоннайа суох диэн буолбута. Бэрэсидьиэн ити иһин кинини ыччат миниистирин дуоһунаһыттан уураппыта.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.