Улан-Удэ куоракка көҥүл тустууга Арассыыйа чөмпүйэнээтэ түмүктэннэ. Туох санаалар үөскүүллэрий? Успуорт бу көрүҥэ биһиги өрөспүүбүлүкэбитигэр норуодунай, төрүт көрүҥнэргэ тэҥнэһэр буолан, дьон интэриэһэ уҕараабат. Ол эрээри, ыалдьааччылар быйылгы чөмпүйэнээт кэнниттэн саха тустууктарыгар эрэллэрин сүтэрэн эрэллэр. Эмиэ биир да мэтээл суох.
edersaas.ru
Леонид Спиридонов бастакы күн кэнниттэн «Спорт Якутии» сайтка: «Уолаттарбыт бэйэлэрин кыахтарын туһанан, бэрткэ туһуннулар. Дьон “хоттордулар-кыайдылар» эрэ диэн хапсыһыылары кэтииллэр, оттон биһиги тустуу ис хоһоонун көрөбүт», — диэн интервью биэрбитэ. Онуоха бу этии ыалдьааччылар ортолоругар араас санааны үөскэттэ. СӨ сүүмэрдэммит хамаандатын сүрүн тириэньэрэ Александр Оконешников тугу этэрий?
—Көрдөрүүбүт мөлтөх бөҕө буоллаҕа дии. Ону аһаҕастык этиэххэ наада. Кыттыыбытын кыайтарыы курдук ылынабыт. Күрэхтэһии кэнниттэн уолаттары кытары улахан кэпсэтии барбыта.
Хамаандабыт улахан аҥара 19-20 саастаах эдэр уолаттар. Улахан дьоҥҥо саҥардыы киирсэн эрэр эдэр бөҕөстөргө уопут тиийбэтэ биллэр. Бары кэриэтэ аан бастакытын маннык таһымнаах чөмпүйэнээккэ кытыннылар. Туораттан көрдөххө, туттар приемнарбыт аҕыйахтар, сатаан көмүскэммэт эбиппит.
Ситиһии аҥардас тириэньэрдэртэн эрэ буолбакка, тустууктартан бэйэлэриттэн эмиэ тутулуктаах. Көрбүккүт курдук, Виктор Рассадин бэйэтигэр сыһыана уларыйан, ирдэбиллээхтик сыһыаннаспыта түмүгү биэрдэ.
Онон, спортсменнар тириэньэр үлэтин сүүс бырыһыан толордохторуна, Арассыыйа лиидердарын кытары элбэхтэ тэҥҥэ дьарыктанан, бодьуустастахтарына, тиэхиньикэни тупсардахха үс-түөрт сылынан эдэр уолаттартан туох эрэ тахсыаҕа диэн эрэллээхпин.
Уйгулаан Ивановы, Айаал Белолюбскайы бэлиэтээн этиэхпин баҕарабын – кыахтарын толору туһаннылар. Билигин көлүөнэ уларыйар кэмигэр хамаандаҕа лиидэр үөскэтиэхпитин наада эбит, – диэн сүрүн тириэньэр Александр Савельевич кэпсээтэ.
Хаартыска «Спорт Якутии» саайтан.