Бу дьыл олунньу, кулун тутар ыйдарыгар биһиги сайтпытыгар «Филиппинканы хаайан олорбут кэргэнниилэргэ дьыала тэрилиннэ», «Өрөспүүбүлүкэ борокуруора Леваднай, Попов, Мамчур дьыалаларын тустарынан», «Филиппины бэрэстэбиитэлэ кэллэ, Россияттан бэрэбиэркэ иһэр», «Филиппинканы хаайыыга буруйданар дьахтарга дьыала тэрилиннэ« диэн матырыйааллар бэчээттэммиттэрэ.
Вера МАКАРОВА, «Саха сирэ» хаһыат, edersaas.ru
Ити суруйуулар ис хоһооннорун кылгастык билиһиннэрдэххэ, Дьокуускай куорат олохтоохторо, кэргэннии Кристина уонна Александр Леваднайдарга РФ Холуобунай кодексатын 127-с ыст. 3-с чааһынан, ол эбэтэр, киһиэхэ ыарахан эчэйиини оҥорон туран, көҥүлү быһыы бэлиэтэ баарынан холуобунай дьыала тэриллибитэ.
Бу «Чистый дом» клининговай хампаанньа хотуна уонна кини эрэ — Дьокуускай куорат полициятын начальнигын солбуйааччы — биир дьиэ кыбартыыратыгар Филиппиныттан төрүттээх, дьиэ хомуйааччынан кинилэргэ үлэлии сылдьыбыт дьахтары кырбаан баран, күүс өттүнэн хоско хаайыыга уорбаламмыттара. Олунньу 12 күнүгэр филиппинка маҥнайгы мэндиэмэн түннүгүттэн ыстанан куотан, ыарахан эчэйиилэри ылан, балыыһаҕа эпэрээссийэлэммитэ.
Бу быһылаан тула атыыр айдаан тахсыбыта. СӨ Борокуратуурата «Чистый дом» хампаанньа үлэ уонна миграция туһунан сокуоннары кэспитин-суоҕун быһаарар сыалтан бэрэбиэркэ саҕалаабыта. Силиэстийэ уорганнара холуобунай дьыаланы тэрийэн, билигин барыллааһын силиэстийэ бара турар. СӨ Ис дьыалаҕа министиэристибэтэ сулууспанан бэрэбиэркэ ыытан, А.Леваднайы ис дьыала уорганнарыттан уураппыттара.
СӨ Борокуратууратын бэрэбиэркэтэ К.Левадная миграция сокуонун ирдэбиллэрин кэһэн, филиппинкалары учуокка туруортарбатаҕын, бу омук дьахталлара Дьокуускай куорат сиригэр-уотугар сокуоннайа суох сылдьыбыттарын быһаарбыта.
Итинэн сибээстээн, Дьокуускай куорат борокуратуурата Левадная дьайыыларыгар РФ Холуобунай кодексатын 322.1 ыст. 1 чааһынан (сокуоннайа суох миграцияны тэрийии) көрүллэр буруй бэлиэтэ баарынан, бэрэбиэркэ матырыйаалларын силиэстийэ уорганнарыгар ыыппыта. Ол матырыйаалларга олоҕуран, РФ Силиэстийэлиир кэмитиэтин Саха сиринээҕи управлениетын Дьокуускай куораттааҕы отдела холуобунай дьыала тэрийбитэ. Билигин силиэстийэ бара турар. Дьыала хаамыыта борокуратуура хонтуруолугар сылдьар.
СӨ Борокуратууратын пресс-сулууспата уонна РФ Силиэстийэлиир кэмитиэтин Саха сиринээҕи управлениета бүгүн иһитиннэрбиттэринэн, А.Леваднайга РФ Холуобунай кодексатын 286-с ыст. 3-с чааһын «а»,»в» пууннарынан холуобунай дьыала тэрилиннэ.
Силиэстийэ сабаҕалыырынан, Леваднай Дьокуускай куорат полициятын экономическай буруйдары уонна хоруупсуйаны утары отделын начальнигын солбуйааччытын дуоһунаһыгар үлэлиир кэмигэр, ойоҕун бизнеһигэр көмөлөһөн, сулууспатын балаһыанньатынан туһанан, боломуочуйатын аһара баран, гражданнарга күүһү туттан, кинилэр бырааптарын, сокуоннай интэриэстэрин кэспит.
Бу иккис дьыала бастакы дьыалаҕа холбоммут. Силиэстийэ салҕанан барар.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн ылылынна.