Александр Козлов ойуур баһаарын умулларыыга эбии күүһү ыытары түргэтэтэргэ соруйда

Ааптар: 
Бөлөххө киир:

Ил Дархан Айсен Николаев бэс ыйын 11 күнүгэр РФ Айылҕа ресурсаларын уонна экологиятын миниистирэ Александр Козлов ыытар мунньаҕар буола турар быһыыны-майгыны, Саха сиригэр ылыллар миэрэлэр тустарынан билиһиннэрдэ.

Киирии тылыгар миниистир Александр Козлов бу мунньах өрөспүүбүлүкэҕэ ойуур баһаарыгар киэҥ иэннээх сир умайа турарынан сибээстээн, тирээн турар боппуруостары быһаарар инниттэн тэриллибитин туһунан бэлиэтээтэ. Миниистир былырыыҥҥыга тэҥнээтэххэ, эрэгийиэҥҥэ баһаар 1,3 төгүл элбээбитин, уустук балаһыанньа үөскээн, өрөспүүбүлүкэҕэ ойуур баһаарын умуруорууга эбии күүһү ыытар сорук турарын эттэ. Статистика чахчытыгар олоҕуран, Александр Козлов 2015 сылтан өрөспүүбүлүкэҕэ ойуур хаһаайыстыбатын үбүлээһин 787 мөлүйүөн солкуобайтан 1,7 млрд солкуобайга диэри үрдээбитин холобурдаата.
Мунньахха Рослесхоз салайааччыта Иван Советников б.дь. бэс ыйын 2 күнүгэр ыытыллыбыт мунньахха Саха сиригэр ойуур баһаарын умулларыыга ылыллыбыт миэрэлэр туолууларын туһунан иһитиннэрдэ. Мунньахха умайбыт ойуур иэнин ахсаана Рослесхоз уонна Саха сирин дааннайдарын отчуоттарыгар сөп түбэспэттэрин туһунан ыйылынна. Дьүүллэһии кэнниттэн Ньурба улууһугар тиийэн, отчуоту оҥорууларын үөрэтэргэ сорудахтанна.
Маны таһынан, мунньахха Ил Дархан Айсен Николаев РФ Бырабыыталыстыбатын Бэрэссэдээтэлин солбуйааччы Виктория Абрамченко аатыгар ойуур баһаарын умулларыыга көмөлөһөргө ыҥырыытын дьүүллэстилэр. Рослесхоз салайааччыта Иван Советников бэлиэтээбитинэн, Саха сиригэр бүгүҥҥү күҥҥэ федеральнай резервэттэн 280 үлэһит тиийэн ойуур баһаарын бохсоллор. Өрөспүүбүлүкэҕэ өссө 100 байыаһы ыытыахтара.
РФ Айылҕа ресурсатын уонна экология миниистирэ Александр Козлов Саха сиригэр эбии күүһү ыытары түргэтэтэри соруйда. Ил Дархан Айсен Николаев мунньахха, ойуур баһаардарыгар сыһыаннаах прокурор бэрэбиэркэтин сөптөөхтүк тэрийэн ыыталларыгар санаатын тиэртэ. Тустаах бэрэбиэркэ, ыксаллаах кэмҥэ мэһэйдээбэккэ, баһаары умулларыы кэнниттэн ыытыллара буоллар, диэн санаатын эттэ. Мунньахха дьүүллэһиигэ кыттыыны СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников уонна СӨ экология, айылҕа харыстабылын уонна тыа хаһаайыстыбатын миниистирэ Сахамин Афанасьев ыллылар.

Елена ПОТОЦКАЯ, «Саха сирэ» хаһыат, edersaas.ru

СӨ Ил Дархан уонна Бырабыыталыстыба пресс-сулууспатын иһитиннэриититтэн,

Мария Васильева (СИА) хаартыскаҕа түһэриитэ

+1
0
+1
0
+1
0
+1
0
+1
0
+1
0
+1
0