Александр Козлов: «Баһаары умуруорарга үбүлээһин улаатыа»

Бөлөххө киир:

Премьер-миниистир Михаил Мишустин бу күннэргэ Уһук Илин эрэгийиэнигэр кэлэн үлэлиир. От ыйын 27 күнүгэр Южно-Сахалинскай куоракка айылҕа көстүүлэрин содулун туоратыы туһунан мунньаҕы ыытта.

Ыксаллаах быһыы-майгы миниистирэ Евгений Зиничев Саха сиригэр ойуур баһаардарын утары охсуһууга 3 Бе-200 сөмөлүөт, 3 Ми-8  бөртөлүөт 260 көтүүнү оҥорон, 8 тыһыынча туонна ууну куппуттарын туһунан иһитиннэрдэ.

Кини хас биирдии эрэгийиэҥҥэ ыксаллаах быһыыны-майгыны туоратар бастайааннай суһал ыстааптары тэрийэргэ этии киллэрдэ. Бу ыстааптары ЫБММ эрэгийиэннээҕи салаалара салайыахтаахтар.

Уһук Илини, Арктиканы сайыннарыы миниистирэ Александр Козлов бу боппуруоска улахан дакылааты оҥордо. Кини этэринэн, Арассыыйа үрдүнэн быйыл 4,5 мөлүйүөн гектар иэннээх сиргэ 10 897 баһаар буолбут. Бу ойуур умайбыт сирин иэнэ буолбатах, баһаар барбыт сирэ барыта ааҕыллар. Ол иһигэр, Уһук Илиҥҥэ 3,9 мөлүйүөн гектар иэннээх 2735 баһаар, Саха сиригэр 2,9 мөлүйүөн гектар иэннээх сиргэ 1212 баһаар буолбут. Ол эбэтэр, аҥаардас Саха сиригэр буолбут баһаар сирин иэнэ Арассыыйаҕа буолбут баһаар сирин аҥаарыттан ордук иэннээх эбит.

Александр Александрович быйыл Саха сиригэр хаһааҥҥытааҕар да  элбэх көмө оҥоһуллубутун бэлиэтээтэ. Ону тэҥэ, киһи, тиэхиньикэ кыайан тиийбэт, ыраах сытар сиргэ баар баһаардары умуруорууга авиатиэхиньикэни туһанан, хамсааһын баарын ыйда.

Ойуур улахан баһаардара хотугу эргимтэни ааһан, Арктика диэки буолар буолбуттарын туһунан эттэ. Онон Красноярскай кыраайга баһаары умулларар киини тэрийбиттэр. Манна бэйэтэ сөмөлүөт көтөр пуортаах, парашютист-десантниктар олорор усулуобуйалара эрдэттэн оҥоһуллубут буолан, 250 мөлүйүөн солкуобайга үбүлэнэн, түргэнник тэриллибит. Саха сиригэр эмиэ маннык баһаары умулларар киин тэриллэр буоллаҕына, бу тэрээһин боппуруостарыгар болҕомтону уурарга эттэ.

Маны тэҥэ, Александр Козлов үбүлээһин, субвенция, нуорма-быраап боппуруостарын таарыйда. Ойуур баһаардарын умуруорарга дойду үрдүнэн барыта 5,6 миллиард солкуобай көрүллэр (бу 6 сыллааҕыны кытары тэҥнээтэххэ, 1,5 төгүл элбэх). Ол эрээри, билиҥҥи туругунан, бу сууманы сыыйа өссө элбэтэр наада диэн кини бэлиэтээтэ. Үбүлээһини үрдэтэргэ саҥа норматив оҥоһуллуохтаах. Манна ыраах сытар, киһи, тиэхиньикэ кыайан тиийбэт баһаардары умуруорарга үп көрүллүөхтээх.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

+1
0
+1
0
+1
0
+1
0
+1
0
+1
0
+1
0