Александр Дьяконов: «Өлбөт үйэлээх полк» оҕолорго аналлаах тэрээһин буолуохтаах!»
Александр Дьяконов, Устуоруйа уонна култуура пааматынньыктарын харыстыыр Бүтүн Арассыыйатааҕы уопсастыба Саха сиринээҕи салаатын сэкирэтээрэ, Дьокуускай куорат устуоруйатын чинчийээччи Кыайыы күнүн хайдах көрсүбүттэрин уонна «Өлбөт үйэлээх полк» сэлэлээн хаамыытыгар санаатын эттэ.
edersaas.ru
— Быйыл коронавирус дьаҥа тарҕанан, ону бохсорго бэйэни хааччахтаныы саҕаламмытыгар, биһиги дьиэ кэргэн даачаҕа көспүппүт. Ол да буоллар, үгэспитин син биир тутустубут. Сэрии кэминээҕи ырыалары ыллаатыбыт, киинэлэри көрдүбүт уонна тэлгэһэбитигэр шашлыктаатыбыт. Кыайыы параада, сэлэлии хаамыы буолбатаҕа хомолтолоох да буоллар, син биир Улуу Кыайыы туһунан өйдөбүл сүрэхпитигэр баар буоллаҕа дии. Хата, ити «Өлбөт үйэлээх полк» онлайн тэрээһинин туһунан сэргээтим. Дьаҥ кэмигэр саамай сөптөөх тэрээһин. Ол эрээри, мин итинник аахсыйаҕа эдэр оҕолор эрэ кыттыахтаахтар дии саныыбын.
Тоҕо диэтэххэ, холобур биһиги, Дьяконовтар, улахан, киэҥ аймахпыт. Мин икки эһээм иккиэн сэрии кыттыылаахтара. Ийэм өттүттэн эһээм, Новиков Николай Николаевич, 1949 сыллаахха сэриигэ ылбыт бааһырыыларыттан өлбүтэ. Иккис эһээм, Дьяконов Гаврил Александрович, 1982 сыллаахха, 72 сааһын туолан баран күн сириттэн барбыта.
«Өлбөт үйэлээх полк» сэлэлээн хаамыы маҥнай тэриллибитигэр, биһиги дьиэ кэргэнинэн эһээлэрбит мэтириэттэрин тутан тахсыбыппыт. Онтон кэнники өйдөөн көрбүтүм, киэҥ аймах бука бары оннук тутан тахсар эбиппит. Өссө бу куорат эрэ иһигэр. Ол иһин, маннык тэрээһиҥҥэ оскуола оҕолоро кытталлара ордук. Кинилэр өйдүөхтээхтэр, ситими быһыа суохтаахтар диэн тус бэйэи санаабын этэбин.