Уопсастыба

Александр Чуприян селекторнай сүбэ мунньаҕы ыытта

РФ гражданскай оборонаҕа, ыксаллаах быһыыга-майгыга уонна айылҕа иэдээнин содулларын туоратыыга миниистирин бастакы солбуйааччы Александр Чуприян селекторнай сүбэ мунньаҕы ыытта.


От ыйын 29 күнүгэр Арассыыйа ЫБММ ситуационнай киинигэр РФ гражданскай оборонаҕа, ыксаллаах быһыыга-майгыга уонна айылҕа иэдээнин содулларын туоратыыга миниистирин бастакы солбуйааччы Александр Чуприян селекторнай сүбэ мунньаҕы ыытта. Мунньахха Саха сирин бырабыыталыстыбатын бэрэссэдээтэлин солбуйааччы Денис Белозеров кытынна. Уһук Илин эрэгийиэннэригэр, ол иһигэр Саха сирин сиригэр-уотугар ыксаллаах балаһыанньаны дьүүллэстилэр.
2019 сыл от ыйын 29 күнүнээҕи туругунан, Саха сиригэр 929 гектарга 25 ойуур баһаарын бохсууга үлэ ыытыллар, итинтэн 10 ойуур баһаарын хаптаттылар. Куһаҕан суоллаах-иистээх уонна тэйиччи сытар сирдэри ойуур баһаарын умулларар тэриллиилэр уонна ИСДМ-Рослесхоз космическай кэтээн көрүүнү оҥороллор. Уопсайа 133 “итии туочука” Алдан, Амма, Үөһээ Бүлүү, Дьааҥы, Усуйаана, Эбээн Бытантай, Горнай, Эдьигээн, Ленскэй, Мииринэй, Нам, Ньурба, Кэбээйи, Өлүөхүмэ, Сунтаар, Таатта, Томпо, Уус Маайа оройуоннарыгар бэлиэтэнэр. Ойуур баһаардарын уопсай иэнэ 1177910,00 гектарга тэҥнэһэр.
“Саха сиригэр 4-5 кылаастаах баһаар бэлиэтэннэ. Ньурба, Сунтаар, Хаҥалас, Мэҥэ Хаҥалас, Уус Алдан оройуоннарыгар ордук ыксаллаах балаһыанньа үөскээтэ. Олус куйаас, кураан күн-дьыл турара эмиэ бэрдэ суох. Ол эрээри балаһыанньа хонтуруолланар. Ойуур уотун умулларыыга 780 тахса киһи кыттар, ол иһигэр федеральнай саппаастан — 102 киһи. Тиэхиньикэ өттүн күүһүрдэбит. 80 тиэхиньикэ уоту хаптатыыга үлэлиир. Бүгүн БЕ-200 сөмөлүөт кэллэ, нэһилиэктэргэ чугаһаабыт уоту умулларыаҕа”, — диэтэ бырабыыталыстыба бэрэссэдээтэлин солбуйааччы Денис Белозеров.
Мунньах түмүгүнэн ойуур баһаардарын умулларар үлэни күүһүрдэргэ сорудахтанна.

Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата

0
0
Telegram @edersaas20

Добавить комментарий