Биллэн турар, бу күннэргэ уһун өрөбүллэр буолан, үксүбүт ким хайдах бириэмэтин атаарарын билсэн, «уопут атастаһабыт».
edersaas.ru
Дьахтар аймахха үгүс ырысыап батсаабынан төттөрү-таары көттөҕө… Оттон ааттаах-суоллаах биллэр дьон иллэҥ кэмнэрин хайдах атааралларын уруккуттан интэриэһиргиир этибит. Бу күннэргэ ол интэриэспит өссө улаатта.
Саха эстрадатын сулуһа Александр Бурнашов күнү быһа дьиэҕэ олорон тугу гынар эбитий?
— Уһун өрөбүллэрим, эмиэ барыларын курдук дьиэҕэ ааһаллар. Ханна да быкпаппыт. Альбомнарбын бэрийэ олорон, санааны сааһылааһын — дууһа уоскулаҥа. Маннык түгэнтэн тэйбитим ырааппыт да эбит…
Оҕолорбутун кытта тэлэбиисэр көрөбүт. Ийэбит ол чуумпу кэмҥэ ас астыыр. Тото-хана аһаан баран, доҕотторбутун кытта батсаабынан кэпсэтэбит, ааспыты санаһабыт, саҥа былааннары торумнуубут, сүбэлэһэбит.
Түгэн көстүбүччэ, кэнсиэрдиир таҥастарбытын сааһылаатыбыт. Сотору тыаҕа таҕыстахпытына, илдьэ барардыы бэлэмнээтибит. Ыйы быһа олордоххо да, дьиэ үлэтэ олох бүппэт. Киһи син биир таах олорбот. Бииртэн биир үлэ тахса турар.
Александр этэригэр дылы, кырдьык, үлэ күннэрин көҥүллээтэхтэринэ, үгүспүт өр кэмҥэ былааннана сылдьыбыт үлэбитин үмүрүтэн, дьиэбитин ып-ыраастык хомунан, күн аайы илиибитин сууна-тараана сылдьарга үөрүйэх дьон буолан тахсарбыт чахчы.
Елена ПОТОЦКАЯ, «Саха сирэ» хаһыат, edersaas.ru