Бэлиитикэ Сүрүн

Александр Авдонин: «Байыаннай үөрэҕэ суох дьону ыыппаппыт»

РФ бэрэсидьиэнэ Владимир Путин балаҕан ыйын 21 күнүгэр Арассыыйаҕа аармыйаҕа ыҥырыыны саҕалыыр туһунан ыйааҕа тахсыбыта. Саха сирин байыаннай комиссара Александр Авдонин бүгүн иһитиннэрбитинэн, бастакы уочарат аармыйаҕа сулууспалаабыт, анал байыаннай үөрэҕи ааспыт, уопуттаах дьон ыҥырыллыахтара.

Илиҥҥи байыаннай уокурук ыстаабын быһаарыныыта бары муниципальнай тэриллиилэргэ баран турар. Аармыйаҕа байыаннай учуокка турар дьон, сокуонунан онтон босхоломмотох буоллахтарына, бары ыҥырыллаллар. Бастакы уочарат байыаннай хамыыһыйа үс сылтан бэттэх сулууспаны ааспыт, байыаннай учуокка турар уонна байыаннай сулууспаҕа уопуттаах дьону ыҥырыаҕа. Байыаннай анал үөрэҕэ суох дьону биһиги ханна да ыыппаппыт. Аармыйаҕа ыҥырыы уонна дьону хомуйуу Дьокуускайга ыытыллар. Мантан салгыы Илиҥҥи байыаннай уокурук этиитинэн байыаннай чаастарга барыахтара, – диэн иһитиннэрэр кини.

Кини бэлиэтииринэн, билигин сулууспалыы сылдьар саллааттар анал байыаннай операцияҕа кыттыбаттар.

Өссө төгүл бэлиэтээн этэбин, аармыйаҕа билигин сулууспалыы сылдьар саллааттар байыаннай анал операцияҕа барбаттар. Аармыйаҕа сылдьыбыттара үстэн үөһээ сылтан ааспыт дьон, наада буоллаҕына, байыаннай чаастарга анал үөрэхтэри барыахтара. Мобилизацияҕа ыҥырыллыбыт дьон бары хантараагынан байыаннай сулууспалаах буолаллар, дуоһунастарыттан, байыаннай званиеларыттан көрөн, 205 тыһыынча солкуобайтан саҕалаан хамнас аахсыахтара. Ону таһынан байыаннайдарга көрүллэр бары социальнай көмө барыта көрүллүөҕэ, – диэн этэр Александр Авдонин. Манна даҕатан эттэххэ, итини таһынан Ил Дархан Айсен Николаев дьаһалынан анал байыаннай операцияҕа кыттар дьон дьиэ кэргэнигэр социальнай көмө оҥоһуллар.

Александр Авдонин этэринэн, аармыйаҕа ыҥырыы суругу туппуттар байыаннай комиссариатка тута тиийэллэрэ ирдэниллэр.

Байыаннай учуокка турар дьон мобилизация бара турар кэмигэр атын эрэгийиэҥҥэ барымаҥ диэн иһитиннэриэхпин баҕарабын. Мобилизацияҕа ыҥырыыны туппут дьон пааспардаах, байыаннай билиэттээх, хамнас ыларга баан каарталаах байыаннай комиссариакка кэлэргитигэр, – диэн иһитиннэрэр кини.

Санатан эттэххэ, аармыйаҕа түөртэн элбэх оҕолоох төрөппүттэр, устудьуоннар, сокуоннай саастарын туола илик бырааттарын, балтыларын көрөр олорор соҕотох эппэкиин, чугас дьонун көрөр олорор киһи, аармыйаҕа сулууспалаабатах, байыаннай үөрэҕэ, уопута суох Арассыыйа олохтооҕо ыҥырыллыбат.

Аграфена КУЗЬМИНА

1
0
Telegram @edersaas20