Өлүөнэ өрүһү туоруур муоста тутулларын туһунан иһитиннэриигэ СӨ тыа хаһаайыстыбатын миниистирэ Александр Атласов санаатын үллэстэр:
— Ил Дархаммыт Айсен Сергеевич көрсөн кэпсэтэн, элбэхтик туруорсан, РФ бэрэсидьиэнэ Владимир Путин бырабыыталыстыба бэрэссэдээтэлэ Дмитрий Медведевкэ сорудах биэрэн, уонунан сылларга быһаарыллыбатах боппуруос оннуттан хамсаан эрдэҕэ. Ити олус үөрүүлээх сонун! Онон долгуйа, үөрэ кэтэһэбит, олоххо киириэ диэн эрэнэбит. Бу бырабыыталыстыбабыт улахан үлэни ыыппытын түмүгэ диэн бэлиэтээн этиэххэ наада.
Бу муоста тутуллан, олоххо киирдэҕинэ, экэниэмикэ да өттүнэн, чуолаан тыа хаһаайыстыбатын салаатыгар улахан көмө буолар. Холобур, тыа хаһаайыстыбатын бородууксуйатын киин сиргэ, дьыл кэмиттэн хаайтарбакка, сылы эргиччи аҕалан атыылааһын, дьон дохуоттаах буоларыгар, сыана түһэригэр төһүү күүс буолар. Онон тыа хаһаайыстыбатын салаатыгар хамсааһын тахсара, олох таһыма үрдүүрэ саарбаҕа суох.
Ангелина Васильева, “Саха сирэ” хаһыат, edersaas.ru
Хаартыскаҕа: Өлүөнү өрүһү туоруур муоста уруһуйа.