Александр Атласов: Тыа хаһаайыстыбатын өйөөһүн саҥа ньымаларын киллэрии бастакы сыла үтүө түмүктэрдээх
Өрөспүүбүлүкэ тыа хаһаайыстыбатын салаатын өйүүр тупсарыллыбыт тиһик бастакы сыла үтүө түмүктэри көрдөрдө. Бастатан туран, хороҕор муостааҕы иитэр кэтэх хаһаайыстыбаларга уонна үүтү батарыынан дьарыктанар тыа хаһаайыстыбатын табаарын оҥорон таһаарааччыларга сыһыаннаах. Бу туһунан Бырабыыталыстыба 2021 сыллааҕы үлэтин отчуотун кэмигэр быһа эфиргэ Александр Атласов эттэ.
“Ньымалары олоххо киллэрии бастакы эрэ сыла диэн бэлиэтиибин. Судаарыстыба өйөбүлүнэн кэтэх хаһаайыстыбалаах 9715 хаһаайыстыба туһанна, кинилэргэ 1 млрд 245 мөл солк. тахса көрүллүбүтэ уонна бу тыа сирин олохтоохторун дохуотугар эбии буолла”, — диэтэ миниистир.
2022 сылга кэтэх хаһаайыстыбалаах гражданнарга сүөһү иитиитин өйүүргэ 1379 мөл солк. көрүлүннэ. Бу үп муниципальнай оройуоннарга быйыл кулун тутар ыйга тиэрдиллиэҕэ. Санатан эттэххэ, Арктика уонна бырамыысыланнай оройуоннарга киирсэр, үүтү соҕотуопкалааһын кииннээн ыытыллыбат улуустарга, 2022 сылтан сүөһү иитиитигэр субвенция кээмэйэ эбиллэн биир ынахха 45000 кээмэйдээх буолла.
Миниистир иһитиннэрбитинэн, бу сыл тохсунньу 1 күнүнээҕи туругунан ынах ахсаана 2 тыһыынча төбөнөн эбилиннэ эбэтэр 2021 сыл саҕаланыытын кытта – 3,3 бырыһыанынан, ол иһигэр нэһилиэнньэ хаһаайыстыбаларыгар – 6,5 %. Бу хаһаайыстыбаларга ордор үүттэрин соҕотуопкаһыт сыанатынан туттарыы оннунан хаалбыта, ол эбэтэр киилэтин иһин 10 солк. кырата суох.
“2021 сылга өрөспүүбүлүкэҕэ 158 тыһыынча туонна үрүҥ илгэ ыанна, 60 тыһыынчаттан тахса туонна үүт соҕотоупкаланна, ол иһигэр 57 тыһыынча туонна судаарыстыба өйөбүлүн суотугар. Бу сыалга 2 млрд 853 мөл солк. көрүллүбүтэ, соҕотуопка сыллааҕы былаана 5,8 бырыһыанынан куоһарылынна. Маны сэргэ 14 оройуон соҕотуопкаһыттарынан бэйэлэрин үптэрин суотугар кэтэх хаһаайыстыбалартан уонна потребкэпэрэтииптэртэн 3 тыһыынча туоннаттан тахса үүт тутулунна”, — диэн эттэ салгыы Александр Атласов.
815 туонна ынах этин, 284 туонна сылгы этин, 7067 туонна хортуоппуйу, 2882 туонна аһаҕас груҥҥа үүнэр оҕуруот аһын уонна 5875 туонна бурдугу соҕотуопкалыахтара.
СӨ Тыа хаһаайыстыбатын министиэристибэтин пресс-сулууспата
Хаартыскаҕа Мария Васильева (СИА) түһэриитэ
Бэлэмнээтэ Женни Стрюкова