Былырыын тыа хаһаайыстыбатын сайыннарыыга саҥа мэхэньиисим олоххо киирбитэ. Ол эбэтэр тэрээһиннээх хаһаайыстыбалар киилэ үүтү 50-нуу солк. туттаран, субсидия үбүн туһаммыттара, ону таһынан, соҕотуопкаһыттар чааһынайдартан 10 солк туппуттара. Инньэ гынан тэрээһиннээх хаһаайыстыбалар киилэтин 60 солк. аахсыбыттара.
“Сэмсэ санаа” биэриигэ тыа хаһаайыстыбатын миниистирэ Александр Атласовы үүт харчыта үрдүүрүн туһунан кэпсээтэ. Александр Павлович: “Айсен Николаев бу күннэргэ үп уонна экэниэмикэ министиэристибэлэригэр үүт сыанатын үрдэтэллэригэр эттэ. Онон сибээстээн, билигин биһиги икки тутаах министиэристибэлэри кытта ити боппуруоска үлэлии сылдьабыт. Бу ый бүтүүтэ чопчу сыыппаралар биллиэхтэрэ», — диэн быһаарда.
Интервьюттан быһа тардыы.
Кэтэх хаһаайыстыбалар ыанар ынахтарын аайы 35-тии тыһ. солк. ылбыттара. Бу саҥа өйөбүлү тыа хаһаайыстыбатынан дьарыктанааччылар араастаан ылыннылар. Ордук кэтэх хаһаайыстыбалар халлаантан түһэр бэлэм харчыны ыланнар сай ортото ынахтарын ыабакка ньирэйдэрин кытта ыыппыттарын түмүгэр, былырыын үүтү туттарыы кыччаата уонна ону ааһан ынах арыыта лаппа аҕыйаата диэччилэр кытары бааллар.
“Саха сирэ” хаһыат эрэдээктэрэ Чокуур Гаврильев тыа хаһаайыстыбатын миниистирэ Александр Атласовы ити туһунан эмиэ туоһуласта. Кэпсэтиини “Саха сирэ” хаһыат кэлэр нүөмэригэр сиһилии билсиэххит, видеотун эмиэ таһаарыахпыт.
Александр Тарасов, «Саха сирэ».