Александр Атласов: «Сүрүн сыалынан-соругунан ынах ахсаанын элбэтии буолар уонна ол ситиһилиннэ» (видео)

Былырыын ыанар ынах аайы 35-тии тыһ. солк көрүллүбүтүн нэһилиэнньэ араастык ылынна. Тыа хаһаайыстыбатын миниистирэ  Александр Атласов “Сэмсэ санаа” биэриигэ  саҥа мэхэньиисим  көдьүүһүн туһунан кэпсээтэ.  

— Бу сүрүн сыалынан-соругунан ыанар ынах ахсаанын элбэтии буолар уонна ол ситиһилиннэ, биллэрдик элбээтэ.  Сыспай сиэллээх ахсаана эмиэ кыратык да буоллар эбилиннэ. Манна биири өйдүөххэ наада. Табаарынай бородууксуйаны оҥорууга аналлаах.  Тоҕо диэтэххэ, ирдэбил олус үрдээтэ, холобур, «меркурий» диэн киирдэ. Маны нэһилиэнньэ бэрт мөккүөрдээхтик ылыммыта эрээри, балтараа сыл курдугунан син оннун-тойун булан сааһыланна. Ааспыт сылтан, үүт бородууксуйата буоллун, тыа хаһаайыстыбатын бородууксуйата буоллун, атыыга тахсар буоллаҕына, хайаан да маркировканы ааһыахтаах. Хас биир упаковкатыттан саҕалаан ханна оҥоһуллубута, ким туттарбыта, ханнык маҕаһыыҥҥа тиийэн атыыланара кытары барыта куйаар-куодунан ыйыллар. Бу үстэ төхтүрүйэн олоххо киирдэ. Бастаан утаа сыыр, моруосунай  хабыллыбыттара. Иккис түһүмэҕэ ааспыт сыл ортото 40 күнтэн  уһун болдьохтоохтук хараллар кыахтаах бородууксуйаҕа киирбитэ. Үһүс түһүмэх ааспыт сыл бүтүүтэ тыа хаһаайыстыбатын бары бородууксуйата хабыллыбыта.   Бу өттүгэр улуустары, тэрээһиннээх хаһаайыстыбалары уонна соҕотуопкалааччылары кытта сөптөөх үлэ ыытыллыбыта. 36 улуус саҥа ирдэбилинэн үлэлииллэрэ ситиһилиннэ, —диэн Александр Павлович кэпсиир.

Кэпсэтииттэн быһа тардыыны манна көрүҥ.

Сиһилии чэппиэрдээҕи хаһыакка билсиҥ. Ону тэҥэ, Ютуб-ханаалга эмиэ тахсыаҕа.

Александр Тарасов, «Саха сирэ» хаһыат.