Александр Атласов: «СӨ Бырабыыталыстыбата кураантан эмсэҕэлээбит улуустарга көмөтө»

СӨ Тыа хаһаайыстыбатын миниистирэ Александр Атласов атырдьах ыйын 5 күнүнээҕи туругунан өрөспүүбүлүкэ үрдүнэн 153 тыһ. туонна от бэлэмнэммитин туһунан иһитиннэрдэ. Бу сылллаҕы былаан 34% тэҥ. Ааспыт сыл туһааннаах кэмин кытта тэҥнээтэххэ, былаантан хаалыы 81 тыһыынча туоннаҕа тэҥнэһэр, бу өтөрүнэн буолбатах кураантан буолара бэлиэтэнэр.

Билигин өрөспүүбүлүкэ үрдүнэн 130-тан тахса мобильнай биригээдэ тэриллибит, олортон бу күҥҥэ 103 биригээдэ ыраах учаастактарга оттуу барбыт.

«Сабаҕалааһынынан ыраах ходуһалартан 35 тыһыынча 838 туонна от охсуллуон сөп. Ону таһынан 17 тыһыынча туонна кэриҥэ кур от баар. Бу быйылгы кыстыгы туоруурга биллэр эбиискэ буолар», — диэн Атласов иһитиннэрдэ. Бүгүҥҥү күн туругунан Амур уонна Магадан уобаластарыттан өрөспүүбүлүкэҕэ 17 тыһ. туонна кэриҥэ сүөһү аһылыгын тиэйэн аҕалыы былааннанар. Бу күннэргэ аттынааҕы уобаластартан оту атыылаһар туһунан дуогабары 4 улуус дьаһалталара түһэрсибиттэр. Уус Алдан улууһа Амур уобалаһыттан 8000 туонна оту атыылаһыаҕа. Чурапчы улууһа кэпсэтиини ыыта сылдьар. Өймөкөөн уонна Томпо улуустара Магадантан от атыылаһар туһунан кэпсэтиилээхтэр.

Атласов оттуур ходуһаларга үүнүү суоҕун туһунан докумуоннары хомуйууга үлэ бара турарын этэр. «Бу докумуоннары Арассыыйа Тыа хаһаайыстыбатын министиэристибэтигэр ыытан баран, Бырабыыталыстыба саппаас пуондатыттан кураантан тахсыбыт ороскуоту толуйарга компенсацияны көрүү туһунан сайаапка түһэриэхпит», — диир Александр Павлович.

Билиҥҥи туругунан кураантан тахсыбыт ороскуоттары толуйууга маннык дьаһаллар ылыллыбыттар:

• СӨ Бырабыыталыстыбатын өттүттэн мобильнай биригээдэлэри өйөөһүҥҥэ өрөспүүбүлүкэ бүддьүөтүттэн 34 мөл. солкуобай көрүлүннэ. Хаалбыт 15 мөлүйүөнү тыа хаһаайыстыбатын сайыннарыы судаарыстыбыннай бырагыраама үбүттэн көрөргө.
• Сүөһү аһылыгын тиэйиигэ үбү ааҕыы бара турар. Кыһыҥҥы суол аһыллыар диэри туттуллуохтаах үбү судаарыстыба бүддьүөтүн суотугар киллэрии ньымаларын көрдөөһүн ыытыллар. Тиэйии сорох ороскуоттарын 2022 сыл бүддьүөтүгэр киллэрэргэ былааннанар.
• Өрөспүүбүкэ дьаһалатата РФ Тыа хаһаайыстыбатын министиэристибэтин кытта РФ Бырабыыталыстыбатын резервнай пуондатыттан кураантан тахсыбыт ороскуокка компенсацияны көрүү туһунан кэпсэтиини саҕалаата.