Александр Атласов үлэлээбит министиэристибэтигэр 13 сыл кэнниттэн миниистир буолан эргилиннэ

Бүгүн, кулун тутар 28 күнүгэр, СӨ баһылыгын уонна бырабыыталыстыбатын дьаһалтатын салайааччы Федор Борисов Тыа хаһаайыстыбатын уонна ас-үөл бэлиитикэтин министиэристибэтин кэлэктиибигэр миниистир эбээһинэһин толорооччунан анаммыт Александр Атласовы билиһиннэрдэ. “Александр Павловиһы Ил Дархан Егор Борисов министиэристибэ уонна Арктика дьыалаларыгар судаарыстыбаннай кэмитиэт, министиэристибэ салаа тэрилтэлэрин үлэлэрин күүһүрдэр сыаллаах анаата”, — диэтэ Федор Михайлович.

Александр Атласов – туора киһи буолбатах, министиэристибэ бэйэтэ үүннэрэн таһаарбыт каадыра. Иркутскайдааҕы тыа хаһаайыстыбатын институтугар үөрэнэн, 1992 с. агроном идэтин ылан кэлэн, дойдутугар “Нам” үөрэтэр-производственнай хаһаайыстыбаҕа исписэлииһинэн, улуустааҕы тыа хаһаайыстыбатын управлениетыгар сүрүн исписэлииһинэн үлэлэлээбитэ. Онтон 1998 с. министиэристибэҕэ сүрүн исписэлииһинэн сыл эрэ үлэлээт, сир үлэтин салаатын салайааччы солбуйааччытынан өрө таһаарыллан, 6 сыл үлэлээн баран, төрөөбүт-үөскээбит нэһилиэгэр I Хомустаахха баһылыгынан талыллыбыта. Нэһилиэги 8 сыл салайбытын кэнниттэн Нам улууһун баһылыгынан талбыттара. Улуус баһылыгын олбоҕор лоп курдук 5 сыл олордо.

“Министиэристибэҕэ, онтон нэһилиэк, улуус таһымнарыгар үлэлиир кэммэр эһигинниин элбэхтик алтыстым, үгүскүтүн билэбин. Онон биир сүбэни тобулан үлэлиирбитигэр эрэнэбин, — диэтэ саҥа миниистир. – Ил Дархан инники үлэбэр сорук туруорда: бастатан, тыа хаһаайыстыбатын бородууксуйатын батарыы бигэ тиһигин тэрийиэхтээхпит; иккиһинэн, кэпэрээссийэни сайыннарыы; үсүһүнэн, туһаныллыбакка сытар сирдэри баһылааһын. Ону тэҥэ бүддьүөттэн көрүллэр үбү көдьүүстээхтик туһаныы, федеральнай бырагыраамаларга кыттыы, өрөспүүбүлүкэ таһымнаах тэриллиилэри өйөөһүн соруктара тураллар”.

Николай Попов: «Сахаплем сүөһүлээх — сирэ суох…»

Министиэристибэ салаа тэрилтэлэриттэн “Сахаплемхолбоһук” АУо генеральнай дириэктэрэ Николай Попов эрэ санаатын этиннэ. “Тыа хаһаайыстыбатыгар быһаарылла илик кыһалҕа элбэх, — диир Николай Николаевич. – Кырдьык, баччаҕа диэри батарыы тиһигэ кыайан олохтоно илик. Туох-ханнык иннинэ бородууксуйаны оҥорон таһаарааччылар интэриэстэрин көмүскүөххэ. Ил Дархан сири туһаныы көдьүүһүн үрдэтэргэ ыйыы биэрбитэ сөптөөх. Бөһүөлэктэртэн сылгыны тэйитиэххэ. Көмө үбү кытыы учаастактарга тахсыбыт сылгылаах хаһаайыстыбаларга эрэ биэриэххэ. “Туймаада-Агроснаб” сирдээх эрээри, сүөһүтэ суох. “Сахаплем” сүөһүлээх – сирэ суох… Доҕоттор, урут дэриэбинэҕэ баар 10-ча тыраахтар барыларын хааччыйар этэ, билигин тиэхиньикэ элбэх диибит гынан баран, тыраахтара суох ыаллар кыайан оттоммоттор. Бу кыһалҕаны кэпэрээссийэ эрэ быһаарыан сөп”.

Василий НИКИФОРОВ.

Аня СЕРГУЧЕВА (ТХМ пресс-сулууспата) хаартыскаҕа түһэриилэрэ.