Кураан сайын буолан, Чурапчы улууһугар от боппуруоһа хаһааҥҥытааҕар даҕаны сытыытык турар. Онон сибээстээн тыа хаһаайыстыбатын миниистирэ Александр Атласов ааспыт икки күҥҥэ Чурапчы улууһугар үлэлээтэ.
edersaas.ru б
Миниистир бастакы күҥҥэ Одьулуун уонна Хоптоҕо нэһилиэктэригэр, сарсыныгар Арыылаах, Кытаанах, Сылаҥ нэһилиэктэригэр сылдьан, балаһыанньаны билистэ. Ол кэнниттэн улуус дьаһалтатыгар Хадаар, Чакыр, Хоптоҕо, Бахсы, Хайахсыт, Мугудай, Төлөй, Одьулуун, Болтоҥо, Хатылы баһылыктарын кытары сирэй көрсөн кэпсэттэ. Мунньаҕы улуус баһылыгын э.т Алексей Ноговицын иилээн-саҕалаан ыытта.
Сүрүн иһитиннэриини маҥнай Александр Атласов оҥордо, кини кэнниттэн улууска оттооһун туругун туһунан тыа хаһаайыстыбатын управлениетын начаалынньыга Александр Сивцев билиһиннэрдэ. Ол онно көстөрүнэн улуус оттооһуҥҥа былаанын, мобильнай биригээдэлэр көмөлөрүнэн, 70-тан тахса бырыһыан толорбут. Нэһилиэктэргэ тиийбэт от Амур уобалаһыттан, Забайкалье кыраайыттан аҕалыллара былааннанар.
Санатан эттэххэ, Александр Атласов, Чурапчы улууһугар оттооһун боппуруоһунан иккис кэлиитэ буолла, ааспыт ый ортото Мэлдьэхсигэ ойуур баһаарын саҕана, Ил Дархан Айсен Николаев кэлиитигэр сүрүн мунньахха кыттыбыта диэн улуус дьаһалтата иһитиннэрэр.
Раиса Сибирякова, «Саха сирэ» хаһыат, edersaas.ru