Коронавирус дьаҥыттан сылтаан үгүс тэрилтэ офиска үлэлииртэн туттунан, исписэлиистэрин дьиэлэригэр олордон үлэлэтэр.
edersaas.ru
Ол эрээри, астыыр-таҥастыыр тэрилтэлэр эрэсиимнэрин кэспэккэ үлэлиир буоланнар, ас-үөл тиийбэт кыһалҕата таһаарыллыбат. Тыа хаһаайыстыбатын министиэристибэтэ социальнай суолталаах аһылык табаардарын оҥорор тэрилтэлэр, хампаанньалар туруктарын, төһө саппаастаахтарын күннэтэ кэтээн көрөр.
Миниистир Александр Атласов «Дьокуускайдааҕы килиэп кэмбинээтэ», «Дьокуускайдааҕы көтөр фабриката» АУо-ларга сылдьан, күннээҕи үлэни-хамнаһы, төһө бородууксуйа оҥоһулларын билистэ, сэрэтэр үлэни күүһүрдэргэ эттэ. Хаһаайыстыбаларга киирэригэр миниистир бастатан туран, санпропускник нөҥүө ааста, фабрика бары үлэһиттэрэ барар процедураларынан, температуратын кээмэйдэттэ, эмчиккэ көрдөрүннэ.
«Дьокуускайдааҕы килиэп кэмбинээтэ» АУо күҥҥэ 20 туонна килиэби, 1,5 туонна кондитерскай аһылыгы оҥорон, график быһыытынан батарыыга ыытар. Наада буолар түбэлтэтигэр, кыамтатын улаатыннарыан сөп. Генеральнай дириэктэр Светлана Кынакытова этэринэн, түөрт ыйга тиийэр сырье баар, сотору кэминэн сыл иккис аҥаарыгар туттуллар бурдук аҕалыллыахтаах.
«Дьокуускайдааҕы көтөр фабриката» АУо эмиэ штаттаах эрэсииминэн үлэлии турар. Күҥҥэ 160 тыһ. сымыыт хомуллар, технологическай хаарта быһыытынан, көтөрдөрү собуойдааһын бүппүт, аны эти астааһын үлэтэ саҕаланыахтаах. Генеральнай дириэктэр Наталия Дягилева сыахха 90 т эт саппааһа баарын этэр. Билигин Мииринэйдээҕи көтөр фабрикатыгар муус устар 8 күнүгэр илдьиллиэхтээх чоппуускалары таһаара сылдьаллар.
– Онон, ас-үөл бүтэн хаалыаҕа, тийиэ суоҕа дииргэ төрүөт төрүт суох, астыыр-таҥастыыр хампаанньалар, хаһаайыстыбалар бары холкутук үлэлии-хамсыы тураллар. Нэһилиэнньэ наадыйыытынан толору хааччыйаллар, сыана үрдээбэт, – диэтэ Александр Атласов.
Бырабыыталыстыба дьаһалынан, «Дьокуускайдааҕы килиэп кэмбинээтигэр» 60 мөл. солк., «Якутоптторг» АУо-ҕа 358 мөл. солк. кирэдьиит бэриллибит. Тыа хаһаайыстыбатын уонна булт бородууксуйаларын массыына суолунан тиэйии-таһыы итиэннэ аһылык табаардарын тиэрдии сорох ороскуотун толуйууга субсидияны ылааччылары талыы саҕаланан, түмүгэ кулун тутар бүтүүтэ биллиэҕэ.
Раиса Сибирякова, «Саха сирэ» edersaas.ru