Маны аах Тыа хаһаайыстыбата

Александр Атласов: 2024 сылга диэри олохтоох аһы-үөлү дэлэтиигэ үлэбит  дьэҥкэ 

Владимир Путин аһаҕас биэриигэ тыа хаһаайыстыбатын, олохтоох аһынан-үөлүнэн хааччыныы боппуруоһун таарыйда.

Тыа хаһаайыстыбатын миниистирэ Александр Атласов өрөспүүбүлүкэҕэ аһылык табаарын розницанан эргииригэр олохтоох ас-үөл тоҕус бырыһыаны ыларын эттэ. Ити иһигэр кэккэ көрдөрүү үрдэтиллэн иһэрин бэлиэтээтэ:

– Статистика чахчытынан, 2019 с. хортуоппуйунан хааччыныы 67 %, үүтүнэн уонна сымыытынан хааччыныы 57 %, оҕуруот аһынан хааччыныы 38 %, этинэн хааччыныы 26 % буолбута. 2020 с. түмүгүнэн кураан тэбэн хортуоппуйунан хааччыныы кыратык түспүтэ, оттон үүтүнэн хааччыныы 57,6 %-ҥа, сымыытынан хааччыныы 59 %-ҥа, этинэн хааччыныы 27 %-ҥа тиийбитэ.

Айсен Николаев 2018 с. таһаарбыт тыа хаһаайыстыбатын стратегическай сайдыытын туһунан Ыйааҕар биир сүрүн соругу чопчу ыйбыта: 2024 с. диэри нэһилиэнньэни бэйэ оҥорор хаачыстыбалаах аһынан-үөлүнэн хааччыйыы таһымын үрдэтиини. Ол курдук, үүт уонна үүттэн оҥоһуллар ас-үөл 61 %, эт уонна эт бородууксуйата 30 %, хортуоппуй 66 %, оҕуруот аһа 51 %, сымыыт 65 % элбэтиллиэхтээх.

Биһиги үлэбит-хамнаспыт барыта бу соругу толорорго туһаайыллар. Сүөһү аһылыгын оҥорон таһаарыыны, ол иһигэр тыа хаһаайыстыбатын тиэхиньикэтин атыылаһыыны, өйөөһүн муниципальнай бырагыраамаларыгар хос үбүлээһин оҥоһуллар. 2017-2020 сс. бу сыалга 147 мөл. солк көрүллэн, 218 тыа хаһаайыстыбатын тиэхиньикэтэ атыылаһылынна. Оҕуруот аһын уонна хортуоппуйу харайар аныгы ыскылааттары тутууга аҥардас быйыл 29 578,5 тыһ. солк көрүллэн, Сэргэ Бэскэ 500 т., «Туймаада-Агроснабка» 2500 т. кыамталаах овощехранилищелар тутуллаллар. Сүөһү иитэр комплекстары тутуу ороскуотун 98,5 %-на толуйуллар. 2018 сылтан 16 комплекс үлэҕэ киллэрилиннэ, 100 сылгы баазатын, 5 сайылыгы тутарга көмө оҥоһулунна.

Быйылгыттан кэтэх ыаллар ыанар ынахтарыгар 35 тыһ. солк. көрүллэр, субсидия биир киилэ үүккэ 35 солкуобайтан 50 солкуобайга тиийэ үрдэтилинэ, кэлэр 2022 сылтан эт, үүт, оҕуруот аһын уонна бурдук салааларыгар көрүллэр өйөбүл ырычааҕа уларытыллыаҕа. Бу барыта өрөспүүбүлүкэ олохтоох аһынан-үөлүнэн хааччыллыытын үрдэтэргэ туһуланар диэн министиэристибэ пресс-киинэ биллэрэр.

Раиса Сибирякова, «Саха сирэ», edersaas.ru

0
0