Александр Артемьев улуустардааҕы АККОР-дар үлэлэрин сөргүтэргэ турунна
Быйыл кыһын Саха сирин бааһынай хаһаайыстыбаларын уонна кэпэрэтииптэрин ассоциациятын (АККОР) бэрэсидьиэнинэн талыллыбыт Александр Артемьев улуустардааҕы уонна куораттардааҕы ассоциациялар үлэлэрин саҥалыы сөргүтэргэ турунна.
edersaas.ru
Нэдиэлэ саҕаланыытыгар АККОР салайааччыта А.Е.Артемьев бочуоттаах бэрэсидьиэн Валерий Ефремовтыын уонна АККОР толорооччу дириэктэрэ Вера Лихановалыын Покровскай куоракка тиийэн, Хаҥалас улууһунааҕы ассоциация отчуоттуур-быыбардыыр мунньаҕар кытыннылар. Мунньахха чилиэннэртэн барыта 37 киһи сырытта. Улуус баһылыга Гаврил Алексеев улууска тыа хаһаайыстыбатын сайыннарыы туһунан иһитиннэриитигэр бааһынайдар оруоллара улаханын бэлиэтээтэ итиэннэ кинилэр министиэристибэ бырагыраамаларыгар көхтөөхтүк кытталларын ассоциация сүрүннүөҕэр эрэнэрин эттэ.
Хаҥаласка — Ирина Владимирова
Улуустааҕы ассоциация 3 сыллааҕы үлэтин бэрэссэдээтэл Евдокия Денисова отчуоттаабытын кэнниттэн саҥа бэрэссэдээтэли таллылар. “Эргистэр” потребкэпэрэтиип толорооччу дириэктэрэ-кылаабынай бухгалтера Ирина Владимирова кандидатурата соҕотоҕун туруоруллубутун биир санаанан таллылар. Ирина Михайловна “Сахаагротехсервис” холбоһукка, МТС ассоциациятыгар, МТС өрөспүүбүлүкэтээҕи агротехническэй киинигэр, Хаҥалас улууһун дьаһалтатыгар, “Туймаада” ҮХАПХ-гар, Россельхозбааҥҥа үлэлээбит үп-харчы эйгэтигэр улахан үөрүйэхтээх исписэлиис буоларынан, Хаҥаласка хамсааһыны таһаарыа диэн эрэнэ күүтэллэр.
Дьокуускайга — Надежда Шелковникова (Ксенофонтова)
Ити кэнниттэн бээтинсэҕэ “Дьокуускай куорат” куораттааҕы уокурукка отчуоттуур-быыбардыыр мунньах тэрилиннэ. Мунньаҕы мэр солбуйааччыта Петр Ефремов салайан ыытта. Хатас нэһилиэгин дьаһалтатыгар тыа хаһаайыстыбатын исписэлииһинэн үлэлиир Надежда Шелковникованы Дьокуускайдааҕы ассоциация бэрэссэдээтэлинэн таларга этии киирбитин эмиэ бары өйөөтүлэр. Биир эрэ киһи туттунна. Надежда Ивановна (ыал буолуон иннинээҕи араспаанньата – Ксенофонтова) Үөһээ Бүлүү Сургуулугуттан төрүттээх, бэтэринээрийэ бырааһа идэлээх, “Сахаплемхолбоһук” тэрилтэҕэ уһуннук үлэлээбитэ.
Ассоциация үлэтин сүрүннүүргэ 9 киһилээх сэбиэт талылынна. Ол иһигэр “СахаАгроПродукт” өрөспүүбүлүкэтээҕи потребкэпэрэтиип бэрэссэдээтэлэ Константин Тимофеев, СӨ хортуоппуй уонна оҕуруот аһын үүннэрээччилэрин сойууһун бэрэссэдээтэлэ Валерий Фомин бааллар. “Ассоциацияны бааһынайдар түмсүүлэрин эрэ курдук саныыр тутах, — диир Александр Еремеевич. – Манна кэпэрэтииптэр эмиэ кыттыһыахтаахтар. Бары бииргэ түмүстэхпитинэ – күүһүрүөхпүт, ыарахаттартан чаҕыйыахпыт суоҕа”.
Салгыы АККОР бэрэсидьиэнэ Александр Артемьев кыттыылаах мунньахтар б.дь. тохсунньу 23 күнүгэр Бүлүү куоракка, онтон 24-кэ Сунтаар сэлиэнньэтигэр, 26-ка Ньурба куоракка ыытыллыахтара. Ити улуустарга ассоциациялар саҥа тэриллиэхтэрэ. Бүлүү сүнньүгэр билиҥҥитэ Үөһээ Бүлүүгэ эрэ эдэр фермер Семен Барчахов салайааччылаах ассоциация үлэлиир.
Василий НИКИФОРОВ, edersaas.ru