Бүгүн, атырдьах ыйын 12 күнүгэр, Федерация Сэбиэтин бэрэссэдээтэлин федеративнай тутулга, эрэгийиэннээҕи бэлиитикэҕэ, олохтоох салайыныыга уонна Хоту дойду дьыалаларыгар солбуйааччы, сенатор Александр Акимов Сунтаар улууһун салалтатын көрсөн, тыын суолталаах хайысхаларга бэрт хорутуулаах кэпсэтии ыытан, сүбэ-ама биэрдэ, ону таһынан инникитин саҥа сыал-сорук ууран элбэх үлэ ыытыллыахтаах диэн кэскиллээх этиилэри көтөхтө.
Улуус киинигэр федеральнай уонна өрөспүүбүлүкэтээҕи бырагыраамаларынан тутулла турар социальнай эбийиэктэргэ сырыттылар. Бартыһаан түөлбэтигэр «Переселение граждан из аварийного жилищного фонда на 2019-2025 годы» бырагырааманан 47 кыбартыыралаах дьиэ, «Комплексное развитие сельских территорий» диэн судаарыстыбаннай бырагырааматынан бассейн уонна РТС түөлбэҕэ 240 миэстэлээх саҥа оҕо саадын дьиэтин көрдүлэр-иһиттилэр.
Салгыы Илимниир нэһилиэгэр “Моя Якутия в 21 веке” бырагыраама чэрчитинэн култуурунай-спортивнай комплекс тутуутун уонна «Татыйыына» фирма тэрийиитинэн «Ил Тосхол» ТХПК 120 сүөһүгэ аналлаах аныгы тииптээх хотон туппутун уонна 86 га сиргэ эбиэс ыспыт буолатын билистилэр.
«Сунтаар улууһа (оройуона)» муниципальнай оройуон дьаһалтатын пресс-сулууспата.