Александр Акимов: «Мин – судаарыстыба социальнай хайысхалаах экэниэмикэтин туһугар»
Федерация Сэбиэтин бэрэссэдээтэлин федеративнай тутулга, эрэгийиэннээҕи бэлиитикэҕэ, олохтоох салайыныыга уонна Хоту дойду дьыалаларыгар солбуйааччы Александр Акимов Ил Түмэн пресс-сулууспатын кытта бэсиэдэтигэр, РФ Төрүт сокуонугар киллэриллээри турар көннөрүүлэргэ социальнай эйгэҕэ уларытыылар дьоһун суолталаахтарын бэлиэтээтэ.
“Судаарыстыба социальнай өттүнэн өйөбүлэ кыһалҕалаах дьоҥҥо ордук наадатын, чуолаан, Уһук Хоту дойдуга суолтатын мин үчүгэйдик билэбин. 90-с сылларга социальнай көмүскэл миниистиринэн үлэлээбитим, оччолорго биһиги “Уһук Хоту дойду усулуобуйатыгар уонна итиннэ тэҥнэммит сирдэргэ олорор уонна үлэлиир дьоҥҥо судаарыстыба мэктиэлэрин уонна толуйууларын туһунан” сокуону ылыммыппыт. Билигин бу сокуону мэктиэлээһиннэр уонна толуйуулар өттүлэригэр чөлүгэр түһэрэбит. Ол иһин, мин аҕа саастаах көлүөнэҕэ биэнсийэ уонна индексация, эдэр ийэлэргэ ийэ хапытаалын төлөбүрүн, элбэх оҕолоохторго босуобуйа, киһи тиийинэн олороругар сөптөөх олох таһымын алын кээмэйин, хамнас төлөбүрүн уонна үөрэнээччилэри босхо эбиэтинэн хааччыйыы быһыытынан судаарыстыба мэктиэлээһиннэрин өйүүбүн”, — диэтэ Александр Акимов.
Сенатор Уһук Хоту дойдуга олорор дьону өйүөх кэриҥнээхпит диэтэ.
“Мин нэһилиэнньэ олоҕун таһымын үрдэтиигэ туһуламмыт судаарыстыба социальнай хайысхалаах экэниэмикэтин туһугар туруулаһабын. Дойду аныгы устуоруйатыгар аан бастаан социальнай өйөбүл Төрүт сокуоҥҥа сүрүн хайысханан буолла. Төрүт сокуоҥҥа биһиги социальнай судаарыстыбаны тутуубут бигэргэнэр. Мин гражданнарга социальнай мэктиэлээһиннэри таарыйар көннөрүүлэри өйүүбүн уонна салгыы даҕаны Хоту дойду олохтоохторун олохторун усулуобуйатын тупсарыыга туһуламмыт сокуоннар ылыллалларын туһугар дьулуһуом”, – диэн бэлиэтээтэ кини.
СИА
Бэлэмнээтэ Женни СТРЮКОВА, “Саха сирэ” хаһыат
Хаартыска: СИА-тан