Александр Акимов: «Арктика министиэристибэтэ былааннаахтык үлэлиэн наада»
Александр Акимов, Федерация Сэбиэтин федеративнай тутулга, эрэгийиэннээҕи бэлиитикэҕэ, олохтоох салайыныыга уонна Хотугу сир дьыалаларыгар кэмитиэт бэрэссэдээтэлин солбуйааччы, Арктика уонна Антарктика сэбиэтин бэрэссэдээтэлэ:
— Сүрдээх үчүгэй түгэн буолла. СӨ бырабыыталыстыбата, Ил Дархан Айсен Николаев, Сэбиэт Федерациятыгар Саха сирин бэрэстэбиитэллэрэ, дьокутааттар аҕыс улууһу Арктическай зонаҕа киллэрии туһунан хас да сыл устата туруорустубут. Дьэ билигин ити боппуруоһу РФ Арктиканы сайыннарыыга саҥа министэристибэтэ, боломуочуйалаах бэрэстэбиитэл Юрий Трутнев өйөөтүлэр. Арктика зонатын кыраныыссалара чуолкайданыаҕа. Арктика сайдыытыгар улахан бырагыраама оҥоһуллаары турар. 2025 сылга диэри тырааныспар, тиэйии-таһыы боппуруостара, дьон олороругар анаан табыгастаах усулуобуйаны олохтооһун боппуруостара быһаарыллыахтара. Онон өрөспүүбүлүкэтээҕи Арктика министиэристибэтэ былааннаахтык үлэлиэн наада.
Бэс ыйыгар Дьокуускайга сэбиэт көһө сылдьар мунньаҕа ыытыллыахтаах. Онно Арктика сайдыытын тула кэпсэтии тахсыаҕа.
Биһиги корр., edersaas.ru