Александр Акимов: Арктика, хотугу дойду сайдыытыгар туһуламмыт бырайыактар тохтооботтор
![](https://edersaas.ru/wp-content/uploads/2022/04/IMG_4152.jpg)
Арҕааҥҥы дойдулар Арассыыйаҕа киллэрбит араас хааччахтара Арктика, хотугу дойду сайдыытыгар туһуламмыт бырайыактарга улаханнык дьайыа суоҕа. Бу туһунан бүгүн Федерация Сэбиэтин чилиэнэ, федеративнай тутулга, эрэгийиэннэр бэлиитикэлэригэр, олохтоох салайыныыга уонна хоту дойду дьыалаларыгар кэмитиэт бэрэссэдээтэлин солбуйааччы Александр Акимов пресс-конференциятын кэмигэр иһитиннэрдэ.
Александр Константинович бэлиэтииринэн, билигин Арассыыйа Арктика, хотугу дойду диэки хайыһан, онно туһулаабыт бырайыактарыгар сүрүн болҕомтотун уурар.
– Хотугу, Арктика дойдуларыгар кэлиҥҥи кэмҥэ болҕомто күүһүрэн, нолуокка чэпчэтиилэр, араас хайысхалаах көмө киирдэ. Хотугу муустаах муоранан сырыы сөргүтүллэн, билигин өссө алта ледокол оҥоһулла сылдьар. Бу бырайыак, биллэн турар, хотугу дойду сайдыытыгар, таһаҕас таһыытыгар улахан суолталаах. Билиҥҥи быыһык кэмҥэ Арассыыйа хотугу дойдуга, Арктикаҕа туһулаабыт бырайыактарын инники күөҥҥэ тутар. Суол-иис да, айылҕа баайын хостооһун, туһаҕа таһаарыы да буоллун, барытын салгыы сайыннарар былааннаах. Азия, Тиихэй акыйаан кытылыгар олорор дойдулары кытары салгыы үлэлиэҕэ, – диэн иһитиннэрэр кини.
Санатан эттэххэ, Александр Акимов Уһук Илин, Арктика, Антарктика сайдыыларын сэбиэтин салайар, ону таһынан Уһук Илин уонна Арктика сайдыытыгар бырабыыталыстыба хамыыһыйатын чилиэнэ. Бу күннэргэ кини Дьокуускайга кэлэн үлэлии сылдьар. Пресс-конференцияҕа иһитиннэрбитинэн, кини Ил Түмэн сис кэмитиэттэрин кытары үлэлиэҕэ, нэһилиэнньэни кытары көрсүөҕэ, М.К.Аммосов аатынан Хотугулуу-илиҥҥи федеральнай университет устудьуоннарыгар Арассыыйа Арктикатын сайдыытыгар анаан лекция ааҕыаҕа. Ону таһынан, мас тардыһыы норуоттар икки ардыларынааҕы федерациятын салайааччытын быһыытынан, спорт бу национальнай көрүҥүн сайыннарыыга университеты кытары дуогабар түһэрсиэҕэ.
Аграфена КУЗЬМИНА