Александр Акимов: «Аан дойду ыччата Сочи куоракка түмсүбүтэ — сайдыы туоһута»

Александр Акимов, РФ Федеральнай Мунньаҕын Федерация Сэбиэтин кэмитиэтин бэрэссэдээтэлин солбуйааччы:

— Мин 1985 сыллаахха Москва куоракка ыытыллыбыт уон иккис аан дойдутааҕы бэстибээлгэ Саха сирин дэлэгээссийэтин салайааччытынан сылдьыбытым. Онно биһиги үрдүк таһымнаахтык кыттыбыппыт. Бу бэстибээлгэ Саха Өрөспүүбүлүкэтэ эмиэ олус үчүгэйдик кытта сылдьар диэн бэлиэтиир тустаахпын. Араас улуустартан 200-чэ кэриҥэ ыччат кэлэн кытта сылдьар. Мин санаабар, Арассыыйаҕа маннык улахан таһымнаах тэрээһин ыытыллара олус улахан оруоллаах. Аан дойду үрдүнэн балаһыанньа сытыырхайан турар кэмигэр, Арассыыйа аан дойдуну түмэр, түмтэ уонна түмэ туруоҕа. Дойдубут бэрэсидьиэнэ Владимир Путин эппитин курдук, «Ыччат билигин салайар хайысханы тутуһуохтаах». Ол иһин бу бэстибээл олус улахан оруоллаах. Бэстибээл арыллыыта аан дойду сүрүн кыһалҕаларын быһаарар тиэмэлээх ааспыта хайҕабыллаах. Бэстибээл девиһэ «сомоҕолоһуу, эйэ, доҕордоһуу туһугар» диэн. Ыччат ити өйдөбүлү иҥэриниэхтээх. Олохпут сайдыыта түргэтээн турар кэмигэр, маннык тэрээһин бэлитиичэскэй суолталаах. Аҕыйах сылынан билиҥҥи ыччат олохпут олугун оҥорор кэмэ кэлиэ. Ол иһин, аан дойду ыччата Сочи куоракка түмсүбүтэ — сайдыы туоһута.

Николай Попов, «Саха сирэ» хаһыат, edersaas.ru