Айылҕа харыстабыла Сүрүн

Александр Агафонов: “Уоту умулларааччылар – биһиги кэммит дьоруойдара”

Саха сиригэр ойуур уотун умулларыыга эрэгиийэн уонна федеральнай күүстэр көмөлөрүнэн күүстээх үлэ барар. Ойуур хаһаайыстыбатын федеральнай агентствотын –Рослесхоз салайааччытын солбуйааччы Александр Агафонов Дьокуускайга кэлэн балаһыанньаны сүрүннүүргэ үлэни-хамнаһы тэрийэр. Кини бүгүн сарсыарда суруналыыстары кытта кылгастык көрүстэ.

Александр Агафонов бэлиэтииринэн, Саха сиригэр ардах-сөҥүү түспэтэҕэ ырааппыта ойуурга баһаар туруутугар сабыдыаллаабыт.

Ол курдук, кини этэринэн, Гидромет санаатынан Саха сиригэр маннык күн-дьыл турбатаҕа ырааппыт. Быһата, килиимэт уларыйыыта көстөн турар суол. Уоту умулларыыга Саха сирэ киэҥ сирдээҕэ-уоттааҕа (5 Францияҕа тэҥ)    ыарахаттары үөскэппит. “Быйыл куйааһы от ыйыгар кэтэспиппит даҕаны, муус устар ыйтан саҕаламмыта. Ойуурга сылдьан көрдөххө сиргэ түспүт көмнөх олоччу кууран-хатан турар. Быһата, буорахтаах буочука курдук ”, — диир кини.

Бастатан туран,”биһиги дьыалабыт саллааттыы” диир федеральнай салайааччы федеральнай күүс олоччу толору кээмэйинэн кэлбитин бэлиэтээтэ. Тэйиччи сытар сирдэргэ уот туруутун умулларыы – бу олоччу Лесоавиаохрана үлэтэ.

— Маннык итиигэ, өҥүрүк куйааска биһиги үлэһиттэрбит муус устар ыйтан туруулаһаллар. Кинилэр дьиҥнээх биһиги кэммит дьоруойдара. Кинилэр хайдахтаах курдук киһи тылынан эппэт ыарахан үлэтигэр сылдьалларый! Үөһэнэн барар баһаардартан олохторугар кутталы көрсөллөр, — диэн Александр Агафонов үлэһиттэрин туһунан үтүө тылынан аҕынна.

Кини этэринэн, зондировщик сөмөлүөт экипаһа үһүс ыйын дьиэтин көрбөккө, манна үлэлиир.

Уоту соруйан ыыталларын туһунан тарҕанар кэпсээҥҥэ тохтоон: “Киһини тылынан өлөрүөххэ сөп. Кэрдиллибит тыаны кистиир туһугар төһө  чөҥөчөҕү уматыахха сөбүн санаан көрүҥ эрэ”, — диир.

Бүгүҥҥү туругунан 43 баһаары умуруорбуттар. “Нэһилиэнньэлээх пууннарга уот суоһаабат”, — диэтэ бүгүҥҥү күннээх турукка олоҕуран кини.

Уонна Саха сирин салалтата ойуурга турбут уоту умулларыыга күүһүн түмэн, тэрээһиннээхтик үлэни тэрийэрин бэлиэтээтэ. Түмүгэр кини ойууру уоттан харыстааһыҥҥа  туруулаһа сылдьар биир идэлээхтэригэр махтанна.

Бэлэмнээтэ Женни Стрюкова

Хаартыскаҕа: А.Агафонов

0
0