«Алдан – Ситим» иһинэн сэминээр бэрт сэргэхтик буолан ааста.
Кириэс Халдьаайы агрооскуолата быйыл күһүн, алтынньы 22 күнүгэр агростатуһу ылбыппыт 10 сылбытын көрсө, «Алдан-Ситим» иһинэн баар агро хайысхалаах оскуолалары түмэн, «ФГОС киириитинэн үөрэҕи таһынан дьарыгы тэрийии» диэн куйаар ситиминэн аан бастаан икки күннээх сэминээр ыыттыбыт. Манна агро хайысхалаах үс оскуола кытынна. Уус Таатта, Мэҥэ Алдан уонна Кириэс Халдьаайы оскуолалара. Манна даҕатан эттэххэ, «Алдан-Ситим» иһинэн үгэскэ кубулуйбут араас тэрээһиннэр тиһигин быспакка ыытыллаллар. Ол курдук, араас күөн күрэстэр, олимпиадалар, спортивнай күрэхтэһиилэр уо.д.а. тэрээһиннэр оскуолалар икки ардыларыгар олус көхтөөхтүк буолаллар.
Тэрээһин бастакы күнүгэр үөрэнээччилэргэ научнай-практическай кэмпириэнсийэ ыытылынна. Манна 1 кылаастан 11 кылааска диэри үөрэнэр оҕолор кытыннылар. Барыта 5 сиэксийэ үлэлээтэ. 1 сиэксийэ «Растениеводство и переработка продукции растениеводства», 2 — «Животноводство и ветеринария», 3 — «Биология и экология», 4 — «Экономика сельского хозяйства и предпринимательство», 5 — «Знатные люди-работники совхоза имени Героя Советского Союза Ф.М.Охлопкова». Манна үс оскуолаттан 51 үлэ киирбитин сиэксийэ аайы анаммыт эспиэрдэр дьүүллээн, кыайыылаахтары быһаардылар. Оҕолор үлэлэрин үчүгэйдик көмүскээтилэр.
Иккис күммүтүгэр учууталларга, педагогическай үлэһиттэргэ сэминээр буолла. Манна бэйэлэрин эҕэрдэлэрин, үлэ былааннарын дириэктэр Слепцов Святослав Артурович, Саха сирин «Кэнчээри ыччата» өрөспүүбүлүкэтээҕи тирэх киин методиһа Сивцева Марина Васильевна, өр сылларга биһиги оскуолабытыгар үөрэтэр-методическай үлэҕэ дириэктэри солбуйааччы Омукчанова Раиса Петровна, Томпо оройуонун үөрэҕирии управлениетын иитии уонна эбии үөрэхтээһин отделын начаалынньыга Винокурова Елена Кимовна сырдаттылар. Ол кэнниттэн бу оскуолалар үлэлэрин билиһиннэрии буолла. Манна Кириэс Халдьаайы орто оскуолатын агро-үөрэхтээһиҥҥэ дириэктэри солбуйааччы Бысыина Матрена Егоровна, Мэҥэ Алдан орто сокуолатын дириэктэрэ Ордахова Татьяна Егоровна, Уус Таатта орто оскуолатыттан Винокуров Гайдар Гаврильевич кыһаларын үлэлэрин кэпсээтилэр. Манна атын оскуолалартан биир уратыбытынан, сүрүн хайысхабыт агро буолан олус интэриэһинэй, болҕомтону тардар.
Салгыы оскуола учууталлара, педүлэһиттэрэ өр сыллаах үлэлэрин үөрүйэхтэрин үллэстибиттэрэ эмиэ ураты сэргэхсийиини таһаарда. Киһи киһиттэн үөрэнэрэ элбэх буолан, бары кэрэхсээтибит, астынныбыт.
Кириэс Халдьаайы орто оскуолатыттан Охлопкова Наталья Ивановна, технология учуутала «Үөрэҕи таһынан дьарыгы тэрийии» диэн темалаан өр сыллаах үлэтин, үлэ лааҕырдарын хайдах тэрийбитин уонна үөрэҕи таһынан дьарыкка учебниктар суохтарынан ханнык кинигэлэри, сурунааллары туһанан оҕолору үөрэтэрин кэпсээтэ. Местникова Мира Николаевна, животноводство учуутала, «Шаг в науку» диэн бырайыак оҥорон, оҕолору кыра кылаастан наукаҕа сыһыаран, араас научнай-чинчийэр үлэлэри ыытаннар, норуоттар икки ардыларынааҕы, Арассыыйатааҕы, өрөспүүбүлүкэтээҕи научнай-практическай кэмпириэнсийэлэргэ ситиһиилээхтик кыттыбыттарын көрөн киһи үөрэр, киэн туттар.
Мэҥэ Алдан орто оскуолатыттан үөрэххэ, үлэҕэ дириэктэри солбуйааччы Степанова Сардаана Николаевна «Аргыс» лааҕыр үлэтин бырайыагын билсиһиннэрдэ. «Аргыс» лааҕыр оҕолоро сылын аайы оҕуруокка ситиһиилээхтик улэлииллэр. Оҕолор үүнээйилэрин аһын Таатта, Томпо оройуоннарыгар батараллар. Үлэҕэ үөрэтии маастара Колодезникова Дария Михайловна «Технология выращивания рассад овощных и цветочных культур на примере МАСОШ» диэн тиэмэнэн үүнээйини, оҕуруот аһын хайдах үүннэрэллэрин уонна атыылыылларын кэпсээтэ. Олус интэриэһинэй кэпсэтии таҕыста, болҕомтону ылла. Хаппыысталарын буорун, олордор иһиттэрин эрдэттэн бэлэмнээбиттэр. Биология уонна химия учуутала Атастырова Елена Васильевна «Молодые профессионалы» чөмпүйэнээккэ «Агрономия» компетенциятыгар оҕону хайдах бэлэмниири сырдатта уонна хайдах кыттыбыттарын сэһэргээтэ. Мэҥэ Алдан оскуолата урут уруккуттан оҕуруот аһын үүнуүүнэн утумнаахтык дьарыктанар, онтуктарын ыһыктыбакка, сирдэрин тутан олороллоро олус кэрэхсибиллээх.
Уус Таатта орто оскуолатыттан химия учуутала Кучурова Наталия Николаевна «Организация первичной производственной деятельности обучающихся на примере школьных кооперативов» диэн үлэтин сырдатта. Оскуола учууталлара уонна оҕолор бары 8 кооперативка хайдыһан, оскуола материальнай-тэхиньиичэскэй баазатын бөҕөргөтүүгэ улэлииллэрин кэпсээтэ. Киһи истэ олорон олус наадалаах, интэриэһинэй эбит диэн толкуйга кэлэр. Эбии үөрэхтээһин педагога Винокурова Наталия Викторовна «Профподготовка в условиях сельской школы» диэн тиэмэнэн үлэтин-хамнаһын сырдатта. Кини «Художественная роспись по дереву» диэн анал идэлээх буолан, оҕолору маска уруһуйдуурга үөрэтэр эбит. Талаанын көрөн сөхтүбүт, оҕолорун ситиһиилэрэ элбэҕэ үөртэ. Араас куонкурустарга, быыстапкаларга кытталлара, кыайаллара — бу учуутал идэтин толору баһылаабытын кэрэһилиир.
Үс оскуола икки күннээх үлэтэ куйаар ситиминэн ситиһиилээхтик ааста. Билиҥҥи үйэҕэ маннык тэрээһиннэри сибээс эрэ баар буоллар, киһи барбакка-кэлбэккэ тэрийиэн ыытыан сөптөөҕө көһүннэ. Үөрэнээччилэрбит үлэлэрин көмүскүү үөрэнэллэригэр, учууталлар, педагогтар уопут атастаһан, оскуолалар хайдах үлэлии-хамсыы олороллорун көрөн-истэн, маннык тэрээһини үгэскэ кубулутан, сыл аайы ыытыахха сөп эбит диэн агросеминарбытын түмүктээтибит.
Түгэнинэн туһанан, агросеминарбытын тэрийбит Кириэс Халдьаайы орто оскуолатын дириэктэригэр Слепцов Святослав Артуровичка, үөрэххэ уонна методическай үлэҕэ дириэктэри солбуйааччы Мегинова Аграфена Ивановнаҕа, бары тэрээһиҥҥэ кыттыбыт кэлэктииппит учууталларыгар, Мэҥэ Алдан, Уус Таатта кыһаларын дириэктэрдэригэр уонна сэминээр кыттыылаахтарыгар, оҕолор салайааччыларыгар дириҥ махталбын тиэрдэбин. Маннык тэрээһиннэр куруутун ыытылла туруохтара диэн эрэнэбин.
Матрена Бысыина,
дириэктэри агро үөрэхтээһиҥҥэ солбуйааччы,
Кириэс Халдьаайы, Томпо
Хаартыскалар: ааптар тиксэриилэрэ