Алдан өрүһү эмиэ киртиттилэр. Бу сырыыга кимнээхтэрэ билиннэ

Бөлөххө киир:

Алтынньы 7 күнүгэр батсаап ситиминэн Алдан өрүскэ түһэр Турукаан  үрэх эмискэ киртийбитин туһунан иһитиннэрэр сыаллаах видео-устуу тарҕаммыта. Тута итини бэрэбиэркэлии Алданнааҕы экологияҕа иниспиэксийэтин исписэлиистэрэ барбыттара.

Бэрэбиэркэ түмүгүнэн, кирдээх ууну онно сир баайын хостуурунан дьарыктанар  тэрилтэ  ыыппыта биллибит. Онон Алданнааҕы уу эбийиэктэрин харыстыыр кэмитиэтэ тустаах тэрилтэҕэ административнай бэрэбиэркэни  ыытан эрэр.  Итини тэҥэ, Турукаан үрэхтэн  уонна  кирдээх ууттан анал боруобалары ылан, лабораторияҕа анаалыска ыыттылар.  Бу кэһиигэ тута  сөптөөх миэрэни ылар инниттэн сөптөөх иһитиннэриини  Саха сиринээҕи федеральнай  айылҕаны туһаныыны хонтуруоллуур Управление  сулууспатыгар, Илин-Сибиирдээҕи территориальнай федеральнай балыктааһыҥҥа агентствотыгар уонна Саха сиринээҕи айылҕа харыстабылын борокуратууратыгар иһитиннэрдилэр.

Санатар буоллахха, алтынньы 4 күнүгэр, социальнай ситимнэринэн Алдан оройуонун Томмот бөһүөлэгин олохтооҕун Алдан өрүс уута олус киртийбитин туһунан видео-устуута тарҕаммыта. Кини: «Түүн  өрүс уута ыраас этэ. Көмүсчүттэр тугу эрэ өрүскэ ыыттылар быһыылаах. Туох даҕаны көстүбэт буолла» — диэн иһитиннэрбит этэ.  СӨ Экологияҕа министиэристибэтин иһинэн Экология өттүнэн куттал суох буолуутугар департамена тута хонтуруолга ылбыта. Алданнааҕы  экологияҕа иниспиэксийэтин исписэлиистэрэ Якокит, Селигдар, Улахан Кураанах үрэхтэри бэрэбиэркэлээбиттэрэ уонна Алдан өрүстэн уу боруобатын ылан, лабораторияҕа ыыппыттара.

Экология өттүнэн куттал суох буолуутугар департаменын салайааччытын солбуйааччы  Степан  Куличкинтан балаһыанньа хайдаҕын-тугун ыйыппыппытыгар, «Алдан өрүс уута ырааһырбыт.  Онон, арааһа,  ханна эрэ биэрэк сиҥнибит буолуон сөп. Аны туран, уу таһыма үрдээн ылбыт. Бэрэбиэркэ кэмигэр хаардаабыт буолан, сөптөөх быһаарыыны ыларга ыарахаттары көрсүбүттэр. Ууттан ирдэбил быһыытынан боруоба ылыллыбыта, ол лабораторияҕа  анаалыска  барбыта»,  — диэн быһааран биэрбитэ.

+1
0
+1
0
+1
0
+1
0
+1
0
+1
0
+1
0