Бэҕэһээ, атырдьах ыйын 26 күнүгэр, Томпотооҕу ГИМС-тэн Алдан өрүскэ ньиэп бородууктатын тохпуттарын туһунан иһитиннэрии киирбит.
Ону тэҥэ, батсаап ситиминэн Саһыллыыр тыраассаттан 4 км сиргэ Алдан өрүскэ сэлээркэни тохпуттарын туһунан иһитиннэрэр видео-устуу күүскэ тарҕанна. СӨ Экологияҕа министиэристибэтэ иһитиннэрбитинэн, Томпотооҕу экологияҕа иниспиэксийэтин исписэлиистэрэ тустаах сиргэ тиийэн бэрэбиэркэни оҥорбуттарын түмүгэр, Алдан өрүс уутун үрдэ ньиэп бородууктатынан киртитиллибитэ быһаарыллыбыт. Өрүс үөһээ тардыытыгар суудуна баар биллибит. Суудуна паалубатыгар таһаҕас тиэйэр массыынаттан люк хайаһыгар уматыгы хачайдаабыттара биллибит. Ууттан анал боруоба ылыллан, экспертиза быһаарыытыгар тиэрдиллибит.
Видео-устуу батсаап ситимиттэн ылылынна.