Алданнарга бүгүн бэлиэ күн. Бүгүн кинилэр аан дойдуну аймаабыт дьаҥы утары быһыыны ылан саҕалаатылар. Өрөбүл күн да буоллар, куорат поликлиникатыгар олохтоохтор тоҕуоруһа мустубуттар.
edersaas.ru
Мантан инньэ поликлиникаҕа хас күн аайы быһыыны туруорар буолуохтара. Үлэ күннэригэр эбиэттэн киэһэ «доруобайа чааһыгар” ылыахтарын сөп. Онтон өрөбүл күннэргэ быраастар уонна фельдшер-вакцинатордар сарсыардаттан быһыыны туруоруохтара.
—Коронавирус утары «Гам-КОВИД-Вак» диэн препаратынан быһыы оҥоһуллар. Быһыыны 18-гар диэри саастаах оҕолор, хат уонна эмтэрэр дьахталлар, хроническай ыарыылаах дьон ылбаттар. Хас биирдии киһиэхэ флакон серията уонна нүөмэрэ суруллар, бу дааннайдар Арассыыйа Госреестрыгар киирэллэр. Быһыыны ылбыт киһи, «Госуслуги» саайт нөҥүө сертификат ыларга суруйтарыахтаах, – диэн Алдан куорат полклиникатын сэбиэдиссэйэ Алина Шкарубо кэпсээтэ.
Оройуоҥҥа кэлбит быһыы бастакы баартыйата учаастактарынан номнуо тарҕаммыта. Билиҥҥитэ 900 доза эмп кэлбититтэн, 400 киһи номнуо быһыыны ыларга суруттарда. Анал быһыы кэбиниэттэрэ Алдан уонна Томмот куораттарыгар, ону таһынан, Аллараа Кураанах балыыһатыгар үлэлииллэр.
Алдан улууһун киин балыыһатын кылаабынай бырааһа Дмитрий Сергин:
—Алдаҥҥа икки пуун үлэлии турар. Наада буоллаҕына үсүһү арыйыахха сөп. Быһыыны ыраах сытар дэриэбинэлэр эмиэ ылыахтара. Холобура, Чагдаҕа уонна Кутанаҕа быраастар биригээдэлэрэ илдьиэҕэ. Олохтоохтору куттаммаккытыгар ыҥырабын, коронавирус дьаҥа олоххо кутталлаах, онон быһыыны ылан бу ыарыыны сэрэппит ордук.
Вакцинация бастакы күнүгэр Алдаҥҥа номнуо 36 киһи вакцинацияланна.
—Быһыыны биэрэллэр үһү диэни истээт, кэргэммин кытары поликлиникаҕа эрийбиппит. Ковид – оонньуу буолбатах. Мин аймахтарым, билэр дьонум коронавируһунан ыалдьыбыттара, ыараханнык аһарыммыттара. Онон, быһыы ылбыт ордук дии саныыбыт, – диэн Алдан олохтооҕо Людмила Бородина санаатын үллэстэр.
Быһыыны ылан баран, пациент тута поликлиникаттан баран хаалбат. Чаас аҥаара быраастар кэтэбиллэригэр сылдьар. Быһыы кэнниттэн, быраастар үс күн физическэй ноҕуруускаланыа суохтаахтар, укол миэстэтин инчэппэттэр.
Ковид-19 утары вакцинация икки түһүмэхтээх, 21 күн кэнниттэн иккис быһыыны ылаҕын. Онон, бүгүн бастаан ылбыт дьон, аны олунньу 13 күнүгэр кэлиэхтэрэ.
edersaas.ru