Алдан хайыһардьыта Михаил Соснин олимпийскай чөмпүйүөнү кэннигэр хаалларда

Сыктывкарга буола турар Арассыыйатааҕы күрэхтэһиигэ Алдан хайыһардьыта, Арассыыйа успуордун маастара Михаил Соснин (35:45.7) көҥүл истиилгэ 10 килэмиэтиргэ үрүҥ көмүс мэтээл иһин киирсиигэ аан дойду күүстээх хайыһардьытын, Олимпиада чөмпүйүөнүн Сергей Устюговы (35:54.6) кыайда.

Бу тыҥааһыннаах күрэхтэһиигэ Михаил кыайыылаахтан Рауль Шакирзяновтан (35:45.6) 1 суотай сөкүүндэнэн эрэ хаалан, иккис буолла.

Арассыыйатааҕы күрэхтэһиигэ 236 хайыһардьыт кытта сылдьар, ол иһигэр дойду сүүмэрдэммит хамаандатын чилиэттэрэ эмиэ бааллар.

Михаил Соснин Алдан куораттаах төрүттээх. Кини хайыһардаан сүүрүүгэ СӨ сүүмэрдэммит хамаандатын лиидэринэн буолбута 15 сылтан таҕыста диэн «Алдан» СШОР пресс-сулууспатын үлэһитэ Ольга Рубашова иһитиннэрэр.