Ааспыт нэдиэлэҕэ ыытыллыбыт Ил Түмэн бастакы пленарнай мунньаҕын спикер талыллыар диэри, сокуоҥҥа сөп түбэһиннэрэн, дьокутааттартан саамай аҕа саастаахтара, Арассыыйа үтүөлээх учуутала, педагогическай наука хандьыдаата Роза Васильевна Солнышкина салайбыта.
Мунньах кэнниттэн көрсүбүппэр, кини маннык кэпсээтэ:
— Мин 1945 сыл кулун тутар 21 күнүгэр Чурапчы Дириҥэр төрөөбүтүм. Аҕам Василий Семенович Эверстов төрүт-уус Хоптоҕо киһитэ, учуутал, ийэм Пелагея Петровна Мордовияттан төрүттээх, акушер-биэлсэр этилэр. Мин биэс оҕоттон улаханнарабын. Оччолорго хомуньуус учууталлары сиртэн сиргэ көһөрөр үгэс баара, ол сиэринэн аҕабыт Уус Алдан улууһугар учууталынан ананан, онно көһөн титийэн, мин Мүрү орто оскуолатын бүтэрбитим. Кэлин Иркутскайдааҕы пединститукка үөрэнэ сырыттахпына, дьонум Алдаҥҥа көспүттэрэ, инньэ гынан үлэһит буолуохпуттан бу дойдуга олохсуйбутум. Оскуолаҕа уонна оҕо дьиэтигэр үлэлээбитим. Оройуон Сэбиэтигэр икки ыҥырыыга (2008 — 2018 сс.) дьокутааттаабытым. Уус Алдаҥҥа олорон Хоптоҕоҕо, аймахтарбытыгар, сайылыы тиийэрбит, онтон кэлин үлэҕэ үтүрүйтэрэн, төрүт сылдьа иликпин. Билигин тоҕоос көһүннэр эрэ, бара сылдьыам этэ. Алданнааҕы биир мандааттаах быыбардыыр уокурукка РФКП-тан норуот дьокутаата буоллум. Ил Түмэн маҥнайгы мунньаҕын салайар чиэскэ тиксэн бэркэ долгуйдум. Сэрии сылын оҕолорун туһунан сокуон бырайыагын бигэргэттибит, онон бэйэм саастыы көлүөнэм туруорсуутун олоххо киллэрсэн, дьокутаат быһыытынан ытык иэспин төлүүрбэр сүрэхтэниибин бардым.
Раиса СИБИРЯКОВА, «Саха сирэ» хаһыат, edersaas.ru