От ыйын 16 күнүгэр Ил Дархан Айсен Николаев Якокит бөһүөлэгэр «Алданское агропромышленное предприятие» ХЭУо эбийиэктэригэр сырытта. Ону тэҥэ, Томмокко “Совхоз Пятилетка” ХЭУо үлэтин кытта билистэ.
«Бүгүн оройуоҥҥа тыа хаһаайыстыбатыгар сыһыаннаах сири-уоту кэҥэтии улахан суолталаах. Бу хайысхаҕа агротэрилтэлэр сөптөөх үлэни ыытыллар. Ону сэргэ, Тыа хаһаайыстыбатын министиэристибэтэ туһаҕа тахсыан сөптөөх сирдэри эбии үөрэтиэх тустаах”, — диэн Айсен Николаев санаатын үллэһиннэ. Алдан олохтоохторо Мундуруччуга тыа хаһаайыстыбатыгар киирэр сирдэртэн судаарыстыбыннай резервэни олохтуур туһунан этиилэрин биһирээтэ.
Санатан эттэххэ, Ил Дархан илии баттаабыт Алдан оройуонун 2030 сылга диэри сайдыытын туһунан Ыйаахха алданнар туруорсууларынан тыа хаһаайыстыбатын сайыннарыыга туһуламмыт тус сыаллаах дьаһаллар киллэриллибиттэрэ.
Ил Дархан Айсен Николаев этэринэн, Алдан олохтоохторо бэйэлэрэ ас-үөл оҥорон хааччынар баҕа санаалара кэм ирдэбилигэр сөп түбэһэр уонна бу соругу олоххо киллэрэргэ сөптөөх сир-уот оройуоҥҥа баар. «Алданское агропромышленное предприятие» ХЭУо сүрүн дьарыга хороҕор муостааҕы иитии, үүт аһы-үөлү оҥоруу. Тэрилтэ дириэктэрэ Александр Заверюха этэринэн, ХЭУо үлэтин кэҥэтиэҕэ, сотору сибиинньэ иитиитинэн уонна оҕоруот аһын үүннэриинэн дьарыктанар былааннаахтар эбит.
Хаһаайыстыба 1350 гектардаах сири арыандаҕа ылан үлэлиир, ол иһигэр бааһына иэнэ 550 гектар, оттуур ходуһа 500 гектар, мэччирэҥ сир 400 гектар кэриҥэ. Былырыын 528 тонна от уонна 721 туонна сенаж бэлэмнэниллибит. Билигин ынах сүөһү ахсаана 376 төбөҕө тэҥнэһэр.
«Совхоз Пятилетка» эмиэ сүрүннээн ынах сүөһү иитиитинэн, үүт аһы-үөлү оҥорон таһаарыынан дьарыктанар. Ону таһынан, сибиинньэни иитэллэр, билигин 47 төрүүр ийэ сибиинньэлэри тутан тураллар. Хаһаайыстыбаҕа 540 гектар сирдээх-уоттаах. Дириэктэр Виктор Тимофеев кэнники сылларга тыа хаһаайыстыбатын эргииригэр 103 гектар бааһына саҥа киллэриллибитин кэпсээтэ. 2021 сылга 172 туонна от уонна 400 туонна сенаж бэлэмнэниллибит. Ынах сүөһү ахсаана 105 төбө, ол иһигэр 66 ыанар ынах баар.