Алдаҥҥа бэйдиэ ыт, бөх-сах, кирдээх хаар кыһалҕаларын туһунан быһа эпииргэ ыйыттылар

Бүгүн, олунньу 1 күнүгэр, «Саха» НКИХ ханаалыгар 11.00 чаастан СӨ бырабыыталыстыбатын 2019 сыллааҕы үлэтин отчуоттаата.

Алдан оройуонуттан биир ис хоһоонноох икки ыйытыы киирдэ. Бояров уонна Глущенко диэн Алдан куоратын олохтоохторо бэйдиэ сылдьар ыт дэлэйин, оҕолор сатаан оскуолаҕа сатыы тиийбэт кыһалҕаламмыттарын, бөх-сах кэмигэр ыраастаммакка куораты биир гына ыһыллыбытын, кырыысалар таах уулусса устун сылдьалларын, кирдээх хаар айан суолун бүөлээн массыыналар садьыаскаланалларын суруйбуттар.

Бырабыыталыстыба бэрэссэдээтэлэ Владимир Солодов тута Алдан оройуонун баһылыгар Северин Поздняковка быһа сибээскэ таҕыста. «Алдан куоратын балаһыанньата чахчы маннык дуо?» диэн ыйытыытыгар Северин Поздняков маннык эппиэти биэрдэ: «Бүгүҥҥү күҥҥэ куонкуруспут, дьэ, түмүктэнэн, бэдэрээччиктэр кимнээхтэрэ билиннэ. Хаары ыраастааһын, бөҕү хомуйуу үлэтэ саҕаланан эрэр», — диэн иһитиннэрдэ.

Онуоха Владмир Солодов тус бэйэтэ саас Алдаҥҥа тиийэн үлэ-хамнас хайдах барбытын иккиэн көрүөхпүт диэтэ. Үлэ ыытыллар куонкурустара, аахсыйалар олохтоох нэһилиэнньэҕэ кыһалҕаны үөскэтиэ суохтаахтар диэн бэлиэтээтэ.

Ульяна ЗАХАРОВА, edersaas.ru