Алдан олохтоохторо «Хаарыан хампа күөх кытылым» испэктээги көрдүлэр

Бэҕэһээ, алтынньы 4 күнүгэр, Алдан Үүнэр көлүөнэтин тыйаатырыгар Саха тыйаатыра Гоголь “Ревизор” кэмиэдьийэтин оонньоон, 114-с театральнай дьылын арыйда. Алдан олохтоохторо уонна ыалдьыттара Саха тыйаатырын артыыстара уобараска киирэр, итэҕэтиилээхтик оонньуур кыахтарын сөҕөн-махтайан, астынан, тыйаатыр аҕалбыт испэктээктэрин көрө кэлиэх буолан бардылар.

Испэктээк иннинэ Саха тыйаатырын артыыстарын делегацията, сахалыы мааны таҥаһын таҥнан, Алдан көрөөччүлэрин Үүнэр көлүөнэ тыйаатырын фойетыгар көрүстэ. Саха тыйаатырын гостуруолун тэрийэн көрсүбүт Алдан Үүнэр көлүөнэтин тыйаатырын үлэһиттэрэ олус сэргэхтэр – тоҕо анньан кэлбит дьону-сэргэни көрсөн, көрөөччү саалатыгар атаараллар.

Саха тыйаатыра 114-с театральнай дьылын Алдаҥҥа арыйар үөрүүлээх түгэнинэн сыанаҕа тахсыыга Үүнэр көлүөнэ тыйаатырын директора Виктория Гофман, Алдан куорат баһылыга Александр Бугай уонна Алдан оройуонун баһылыга Северин Поздняков кыттыыны ыллылар.

Виктория Гофман: «Саха тыйаатырын маҥнайгы гостуруола икки тыйаатыр чугас доҕордоһууларын саҕаалаата«, — диэн туран, инникитин даҕаны бииргэ үлэлэһэ турарыгар эрэллээҕин эттэ. Александр Бугай Саха тыйаатырын гостуруола үрдүк таһымнаахтык ааһыа диэн эрэннэрдэ уонна Алдан Үүнэр көлүөнэ тыйаатырын 40 сылын бэлиэтиир үбүлүөйдээх тэрээһинигэр ыҥырда. Алдан баһылыга Саха тыйаатырын делегациятыгар Алдан куората ойуулаах хартыынаны: “Тыйаатыргыт эркинигэр өйдүү-саныы сылдьар гына ыйаан кэбиһээриҥ”, — диэн бэлэх туттарда. Северин Поздняков Саха тыйаатыра 114-с театральнай дьылын арыллыыта былырыын Алдан улууһугар буолбут Олоҥхо ыһыаҕын курдук эмиэ улахан сабыытыйа буоларын бэлиэтээн туран: «Саха тыйаатырын Алдан сиригэр күүтэ туруохпут», — диэн тус санаатын эттэ. Саха тыйаатырын артыыстарын делегацията ыҥырыылаах ыалдьыттарыгар тыйаатыр көмүс пуондатыттан Саха тыйаатырын антологиятын кинигэтин бэлэх туттарда, Алдан олохтоохторун гостуруол испэктээктэригэр көхтөөх кыттыыны ылалларыгар ыҥырда.

“Ревизор” кэмиэдьийэни көрөөччү олус астынна. Саха тыйаатырын артыыстара идэтийбит артыыстар буолалларын быһыытынан оонньуур таһымнара уратытын, үгүс араас эмоцияны сатабыллаахтык тиэрдэр улахан кыахтаахтарын cөҕөн-махтайан, тыйаатыр атын испэктээктэригэр хайаан да сылдьыахпыт диэн бардылар.

Бүгүн эбиэттэн киэhээ Алдан Үүнэр көлүөнэ тыйаатырыгар “Хаарыан хампа күөх кытылым” испэктээк репетицията бара турар – тыйаатыр артыыстара оруолларын тылын хатылыыллар, ол быыhыгар туруоруу туох баар тиэхиньиичэскэй өртүн, уотун-күөhүн барытын кэриэтэ туруоран, бука бары биир тыынынан үлэлииллэр.

Саха тыйаатырын артыыhа, РФ судаарыстыбаннай бириэмийэтин лауреата, Саха сирин үтүөлээх артыыhа, “Хаарыан хампа күөх кытылым” испэктээккэ Мылгун оруолун оонньуур Иннокентий Луковцев тус санаатын этэр:

— Алдан уонна Нерюнгри улуустарыгар Саха тыйаатырын 114-с театральнай дьылын арыйа кэлбиппит Сомоҕолоhуу сылыгар, Тыйаатыр сылыгар олоҕурар. Манна олорор дьон туспа менталитеттаах, өйдөөх санаалаах дьон. Онон, Саха тыйаатырын сахалыы тыынын көрдөрө кэлбит биир эмиэ сыалбыт-сорукпут буолар. Оттон бу “Хаарыан хампа күөх кытылым” туhунан этэр буоллахха, бүтүн Арассыыйа араас муннуктарынан сылдьан көрдөрбүт испэктээкпит, хомойуох иhин, Сахабыт сиригэр гостуруолга сылдьыбат, тыйаатырга эрэ көрдөрүллэр. Cүүрбэттэн тахса сыллааҕыта Чурапчы улууhугар туруора сылдьыбыппыт. Ол кэнниттэн бу Алдан улууhугар кэллэ. Оттон бу Алдан Үүнэр көлүөнэ тыйаатырын сыаната куорат тыйаатыра буоларын быhыытынан эппиэттэhэр эрээри, арыый да кыараҕас. Оттон билигин улуус кииннэригэр тыйаатыр сыанатыгар эппиэттэhэр кыахтаах сыаналаах араас кулууптар даҕаны, култуура дьиэлэрэ даҕаны тутуллан эрэллэр. Атын да улуустарга бу испэктээкпит көрдөрүллүөн сөп эбит диэн санааҕа киhи кэлэр.

Ангелла Попова.