Ахсынньы 15 күнүгэр Алдан оройуонугар көмүс хостуур тэрилтэ үлэһитин үрдүгэр муус түһэн саахал тахсыбыта. Саахал түмүгүнэн холуобунай дьыала тэриллэр буолла.
Киэһэлик, 16 чаас саҕана, дьахтар атын үлэһиттэри солбуйаары драгаттан тахсан испит. Ол кэмҥэ атын үлэһиттэр итии уунан агрегаты сууйа сылдьыбыттар. Күөл анныттан көмүһү таһаарар сыаптан муус төлө баран, дьахтар төбөтүгэр түспүт. Ыарахан туруктаах үлэһити балыыһаҕа илдьибиттэр. Муус түспүтүгэр дьахтар төбөтүн уҥуоҕа хайдыбыт уонна атын уорганнара эмиэ эмсэҕэлээбиттэр. Билигин быраастар кэтэбиллэригэр сытар.
Силиэстийэ биллэрэринэн, көмүс хостуур тэрилтэ салалтатыгар холуобунай дьыала тэриллэн эрэр. Үлэлиир учаастакка куттала суох буолуу ирдэбилэ кэһиллибитэ бэлиэтэннэ. Салгын тымныыта -30 кыраадыстан түстэҕинэ үлэ барыта тохтуохтаах. Оттон онно саахал тахсар күнүгэр салгын -44 кыраадыска тиийэ тымныйбыта биллэр.
Николай Попов, «Саха сирэ» хаһыат, edersaas.ru