Дьаҥы сыһыарыыга кутталы үөскэппит Алдан олохтооҕор холуобунай дьыала тэрилиннэ
Коронавируһунан үгүс киһини сутуйуон сөптөөх Алдан улууһун олохтооҕор холуобунай дьыала тэрилиннэ.
СИА-ҕа өрөспүүбүлүкэтээҕи Ис Дьыала Министиэристибэтин пресс-сулууспата иһитиннэрбитинэн, 49 саастаах эр киһи төһө эмэ ханна да тахсыбакка дьиэҕэ олоруу туһунан Роспотребнадзор биллэриитин ылбытын үрдүнэн, бу ирдэбили тутуспатах.
«Быһа барыллаан эр киһи куорат уопсастыбаннай сирдэригэр сылдьан, элбэх киһини кытта алтыспыт бадахтаах. Бу кэмҥэ ол дьону булан, обсерваторга киллэрдибит. Дьону дьаҥынан сутуйуон сөптөөх эр киһи бэйэтэ Алданнааҕы киин балыыһа инфекционнай отделениетыгар эмтэнэ сытар», — диэн полиция иһитиннэрдэ.
Холуобунай дьыала «санитарнай-эпидемиологическай быраабыланы кэһэн, маассабай ыалдьааһыҥҥа кутталы үөскэтии иһин» РФ УК 236 ыстатыйатын 1 чааһыгар олоҕуран РФ Ис дьыала министиэристибэтин Алдан оройуонунааҕы отделынан тэрилиннэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА.