Сүрүн Уопсастыба Успуорт

Алдаҥҥа спортивнай комплекс саҥардылынна

Бүгүн, балаҕан ыйын 13 күнүгэр, Ил Дархан Айсен Николаев Алдан оройуонугар үлэлиир. Кини “Энергетик” спортивнай-чэбдигирдэр комплекс дьиэтин өрөмүөннээн, чөлүгэр түһэриини үөрүүлээх быһыыга-майгыга арыйыыга кыттыыны ылла.

Бу спортивнай комплекс 1974 сыллаахха тутуллубут. 1992 сыллаахха туспа киирэр ааннаах бассейны сыһыары туппуттар.

2016 сылтан дьиэни өрөмүөннээһин, чөлүгэр түһэрии үлэтэ саҕаламмыта. Тутааччылар бассейны кытта спортивнай комплексы холбуур тутууну көтүрэн баран, саҥаттан туппуттара. Алдан олохтоохторо бу күнү кэтэспиттэрэ ыраатта.

Айсен Николаев кинилэри үөрүүлээх түгэнинэн эҕэрдэлээтэ.

Алдан олохтоохторугар бу ааспыт нэдиэлэ олус үөрүүлээх буолла. Бэрэсидьиэн Владимир Путин Алдаҥҥа “Килбиэннээх үлэ куората” бочуоттаах ааты иҥэрэр туһунан ыйаахха илии баттаата. Бу саҥардыллыбыт уораҕайтан Саха сирин, Арассыыйа, оннооҕор аан дойду спортивнай сулустара саҕыллан тахсыахтара диэн эрэнэбин, — диэн кини эттэ.

Оройуон баһылыга Северин Поздняков олохтоохтор ааттарыттан өрөспүүбүлүкэ салалтатыгар махталын биллэрдэ.

Энергетик” спортивнай-чэбдигирдэр комплекс уопсай иэнэ 2176 кв.м. Бассейн дьиэтэ икки этээстээх, үөһээ этээһигэр таҥнар, паарданар, суунар, массаастыыр хостор, душ, быраас, сиэстэрэ хосторо бааллар. Бассейн саалатын үрдүгэ – 4 миэтэрэ. Бассейн 25 миэтэрэ уһуннаах, 8,5 миэтэрэ кэтиттээх.

Ангелина Васильева, “Саха сирэ” хаһыат, edersaas.ru

Хаартыска: Андрей Сорокин, СИА.

0
0