Бүгүн, кулун тутар 23 күнүттэн, Алдан оройуонугар саха литературатын күннэрэ саҕаланнылар. Тэрээһини Саха сирин суруйааччыларын сойууһа “Суруйааччы уонна кэм” литературнай экспедиция чэрчитинэн ыытар.
Быйыл кулун тутартан саҕалаан Саха сирин суруйааччыларын сойууһа өрөспүүбүлүкэ сүүс сыллаах үбүлүөйүн көрсө литературнай экспедицияны саҕалаабыта. Народнай поэт Наталья Харлампьева Чурапчы, Таатта, Уус Алдан улуустарынан сылдьан экспедицияны арыйбыта. Бырайыак иккис биир сүрүн пуунунан Алдан оройуонун айар куттаах дьонун-сэргэтин, ааҕааччылары кытары көрсүү буолуохтааҕа.
Санатан эттэххэ, Алдан оройуонугар 80-с сыллар ортолоругар Алдаҥҥа саха суруйааччыларын десана кэлэн барбыта. Ол кэмтэн ыла саха литературатын күннэрэ бу оройуоҥҥа ыытылла иликтэр. Саха сирин суруйааччыларын сойууһун бэрэссэдээтэлэ Наталья Харлампьева бэлиэтииринэн, литератураны сэргээччилэргэ бу кэтэһиилээх тэрээһининэн буолла.
— Туох барыта кыраттан саҕаланар диэн этэллэр. Былырыын нуучча литературатыгар ылсан үлэлиэн баҕалаах дьоҥҥо эдэр ааптардарга анаан сайыҥҥы семинар ыыппыппыт. Онно Алдантан Любовь Хмарова кыттыбыта. Ити билсиһиибит, көрөргүт курдук, кэскиллээх, сиэттиһэн кэлэр бырайыактардаах буолан таҕыста, — диэн бэлиэтиир Наталья Ивановна.
Оройуон баһылыгын социальнай боппуруостарга солбуйааччы Игорь Сахно иһитиннэрбитинэн, эһиил Алдан оройуона сүүс сыллаах үбүлүөйүн бэлиэтиир. Онон маннык литературнай экспедициялар кэлэллэрэ ураты суолталаах.
— Дьаҥ-дьаһах кэнниттэн бу маннык аһаҕас кэпсэтиилэр, урукку курдук атах тэпсэн олорон эрэ кэпсэтиилэр ыытыллаллара барыбытыгар да ураты суолталаах. Духуобунай сайдыы диэн кэпсэтэр эбит буоллахпытына, биһиги литературата, искусствота, музыката суох кыайан кэпсэппэппит. Култуура, литература нөҥүө биһиги кэлэр кэнчээри ыччаппытыгар духуобунай баайбытын тиэрдэбит, дойдуга бэриниилээх буолууга иитэбит. Иккис өттүнэн, Алдан оройуонун эһиилги сүүс сыллаах үбүлүөйүн көрсө бу маннык тэрээһин буолбута икки бүк суолталаах, — диэн бэлиэтиир Игорь Васильевич.
Литературнай экспедицияҕа народнай суруйааччы Николай Лугинов, поэт, “Чолбон” сурунаал кылаабынай эрэдээктэрэ Гаврил Андросов кытта сылдьаллар. Бүгүн суруйааччылар Н.А.Некрасов аатынан оройуоннааҕы киин библиотекаҕа сырыттылар, ааҕааччылары, айар түмсүүлэри кытары көрүстүлэр. Сарсын, өйүүн суруйааччылар Томмот, Хатыыстыыр дьонун-сэргэтин кытары көрсүөхтэрэ. Кулун тутар 25 күнүгэр Алдаҥҥа народнай суруйааччы Николай Лугинов “Таас тумус” сэһэнигэр олоҕуран оҥоһуллубут “Мин үрдүбэр күн киирбэт” диэн уус-уран киинэ сүрэхтэниитэ уонна киинэ туһунан кэпсэтии ыытыллыаҕа.
Аграфена КУЗЬМИНА