Алдан оройуонун олохтоохторо баһылыктарын таллылар. Быыбар үс күн устата ыытылынна. Куоластааһыҥҥа нэһилиэнньэ 25,85 % таҕыста.
Оройуон баһылыгын быыбарыгар барыта түөрт кандидат турбута. Ол курдук, “Гражданскай платформаттан” Ярослав Евдокимов, “ЛДПР” баартыйаттан Игорь Стецов, “Биир ньыгыл Арассыыйаттан” Александр Шестопалов уонна “Сиэрдээх Арассыыйа-кырдьык туһугар” баартыйаттан Константин Шкулепо. Уопсай түмүккэ куоластааччылар 52,45 % ылан, “Невер-Дьокуускай” суолун управлениетын салайааччыта Александр Шестопалов оройуон баһылыгынан талылынна.
Санатан эттэххэ, Алдан оройуонун депутаттарын сэбиэтин быһаарыытынан, баһылык быыбара үс күн устата, муус устар 15-17 күннэригэр, ыытыллыбыта. Кулун тутар 27 күнүттэн суола-ииһэ суох, ыраах сытар нэһилиэнньэлээх пууннарга эрдэ куоластааһын саҕаламмыта. Болдьоҕун иннинэ 40 киһи куоластаабыта. Быыбар киин хамыыһыйата иһитиннэрбитинэн, куоластааһын кэмигэр сокуону, быыбар хаамыытын кэһии тахсыбатах. Үс күн устата быыбардыыр учаастактарга кандидаттартан кэтээн көрөөччүлэр уонна уопсастыбаннай палаата чилиэннэрэ үлэлээбиттэр.
Аграфена КУЗЬМИНА