Сайтпытыгар бу дьыл кулун тутар 9 күнүгэр «Оҕо хаарга баттатан, суорума суолланна»диэн иһитиннэриибит бэчээттэммитэ. Онно Алдан оройуонун Аллараа Кураанах бөһүөлэгэр 8 саастаах оҕо хаарга баттатан өлбүтүн туһунан суруйбуппут.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу чахчынан РФ Холуобунай кодексатын 109-с ыст. 2-с чааһынан холуобунай дьыала тэриллибит. Ол эбэтэр, идэнэн эбээһинэһи сөптөөхтүк толорбокко, сэрэҕэ суохтан киһини өлүүгэ тиэрдии бэлиэтэ баарынан.
Силиэстийэ сабаҕалыырынан, кулун тутар 7 күнүгэр күнүс 8 саастаах уол икки доҕорун кытта бөһүөлэк устун дьаарбайа сылдьан, Федоренко уулуссатыгар турар биир этээстээх дьиэ үрдүгэр ыттан тахсыбыт.
Кырыыһаҕа элбэх халыҥ хаар мунньуллан, оҕо тахсыбытыгар хамсаан, уол хаары кытта аллараа курулаабыт. Уонна ол түспүт хаартан кыайан оронон тахсаахтаабатах… Барыллаан быһаарыынан, уолчаан үлүйэн өлөөхтөөбүт…
Процессуальнай бэрэбиэркэ быһаарбытынан, бу хас да кыбартыыралаах дьиэни коммунальнай сулууспалар хааччыйбаттар эбит. Биир эрэ ыал олорорун иһин. Бу ыал социальнай наймылаһыы бэрээдэгинэн олорор эбит.
Маны таһынан, кыра саастаах оҕо сүппүтүн туһунан иһитиннэрии туһааннаах уорганнарга ол күн киирбэтэх. Тута биллэрбиттэрэ буоллар, оҕо эрэйдээх тыыннаах хаалыа эбитэ буолуо…
Силиэстийэ барар.
Алдан борокуратуурата бу чахчынан туспа бэрэбиэркэ ыытар.
Биһиги корр., «Саха сирэ» хаһыат, edersaas.ru
Хаартыска: интэриниэттэн