Олунньу 7 күнүгэр СӨ бырабыыталыстыбата Алдан оройуонугар отчуоттаата. Мунньах онлайн көрүҥүнэн ыытылынна. Кэмпириэнсийэни бырабыыталыстыба бэрэссэдээтэлин бастакы солбуйааччы Кирилл Бычков салайан ыытта.
Кини бэлиэтээбитинэн, онлайн көрүҥүнэн мунньахха ордук элбэх исписэлиис, министиэристибэ кытынна. Урукку курдук айаннаан тиийбиттэрэ буоллар, аҕыйах киһи тиийэрэ эрэбил. Онон Алдан оройуонун олохтоохторо туруорсар боппуруостарыгар толору хоруйу ыллылар. Нэһилиэктэринэн мустан, бары бииргэ холбоннулар. Олус элбэх киһини муспакка, сүрүннээн дьаһалта үлэһиттэрэ, нэһилиэк дьокутааттара кыттыыны ыллылар.
Кирилл Евгеньевич 2021 сылга өрөспүүбүлүкэ сүрүн ситиһиилэрин, бэлиэ көрдөрүүлэрин туһунан отчуотун кэнниттэн, ыйытыыларга, туруорсар боппуруостарга киирдилэр.
Алдан куорат дьаһалтата суолу аспааллааһын, ыттары көрөр-харайар пуун тутуутугар кыттыгас үбүлээһини, ойуур баһаардарын утары минерализованнай балаһалары оҥоруу, оптуобустары сүүрдүү, оттуллар чох хаачыстыбатын тупсарыы, хаарбах дьиэлэртэн көһөрүү боппуруостарын туруорустулар. Тутааччылар матырыйаалга сыана олус үрдээбитинэн, үлэлэрин тохтотон тураллар. Холобур, Томмокко олорор дьиэ 1 кв.м. сыаната 125 тыһыынча солкуобайга тэҥнэһэр. Онон матырыйаал сыанатын түһэрэн дуу, эбэтэр, эбии үбү көрөн дуу, тутууну бүтэрэргэ туруорсаллар.
Улахан Нимныыр бөһүөлэгэр биэлсэр-акушер пуунун хаһыс да сылын туруорсаллар эрээри, бырагыраамаҕа да киирэ илик эбит. Манна доруобуйа харыстабылын миниистирэ Лена Афанасьева бырагыраамаҕа киирсэргэ эбии сайаапканы ыытарга сүбэлээтэ, бу боппуруоска үлэлэһиэхпит диэн эрэннэрдэ.
Ветеринария департаменын үлэһитэ Саргылаана Павлова хоруйдаабытынан, ыттары көрөр-харайар пууну тутууга кыттыгас үбүлээһин бырагыраамата үлэлиир. Бастакы сылыгар бу чэрчитинэн үп көрүллэн, пуун дьиэтэ тутулла турар.
Алдан куоракка оптуобустар тиийбэттэрэ кыһалҕаны үөскэтэр. Саха АССР 100 сылыгар 100 оптуобус кэлиэхтээх. Бу оптуобустар гааһынан эрэ бараллар эбит, улуустарга гааһынан саппараапкалыыр ыстаансыйалар суохтарынан, сайаапка хомуллубут эрээри, Дьокуускайга эрэ тиксэр буолбуттар. Ол эрээри, Алдаҥҥа икки гаас саппараапката баар эрээри, улуус дьаһалтата ирдэбиллэри үөрэтэн баран, сайаапканы быйыл ыыппатах. “Доступная среда” бырагырааманан кыаммат дьоҥҥо 1 оптуобус, үөрэҕирии хайысхатынан оскуолаларга 7 оптуобус бэриллибитэ бэлиэтэннэ.
Салгыы атын нэһилиэктэр боппуруостарын ырытыстылар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru