От ыйын 25 күнүгэр Саха сиринээҕи Быыһыыр сулууспаҕа Алдан оройуонугар 14 саастаах уол оҕо ийэтин кытта сураҕа суох сүппүттэрин туһунан иһитиннэрии киирбит. Кэлин биллибитинэн, дьахтар уолун кытта от ыйын 21 күнүгэр Медведевка үрэх аттыгар баар таба ыстаадатыгар үлэлиир эригэр барбыт эбит.
От ыйын 26 күнүн сарсыардатыгар быһааччылар, полиция үлэһиттэрэ, сүппүт дьон аймахтара хас даҕаны бөлөххө арахсан көрдүүр үлэни саҕалаабыттар. Күнүс 13:40 чааска дьахтары уонна уолу көрдүүр бөлөх лааҕырыттан түөрт км тэйиччи сиртэн үрэх кытылыттан булбуттар.
Дьахтар кэпсээбитинэн, ыстаадаҕа тиийбиттэрэ ким даҕаны суох эбит, ол иһин төннөргө быһаарыммыттар. Аймахтара ыстаада үлэһиттэрин кытта көрсүбэтэхтэрин билэн тыллаабыттар. Биэс күн устата дьахтар уолунаан тугу даҕаны биллэрбэккэ сүтэн хаалбыттар. Сүппүт дьахтар этэринэн, сотору кэминэн астара бүппүт, онон сир аһын итигэстээн уонна үрэхтэн уу иһэн сылдьыбыттар.
«Быыһыыр сулууспаны көрсөн сүппүт дьон олус үөрбүттэр. Кинилэргэ чэй иһэрдибиттэр, аһаппыттар, бастакы көмөҕө наадыйбаттар. Квадроциклынан лааҕырга диэри аҕалан, салгыы Алдаҥҥа илдьибиттэр», — диэн Алданнааҕы быыһыыр-көрдүүр этэрээт начаалынньыга Максим Батуев иһитиннэрэр.
Өрөспүүбүлүкэ быыһыыр сулууспата санатар: ыксаллаах быһыыга-майгыга биир кэлим нүөмэр үлэлиир — 112. Дьуһуурунай нүөмэрэ: (4112) 45-90-19.