Бэлиитикэ Уопсастыба

Алдаҥҥа биэрэпис сүрүн түһүмэҕэ саҕаланна

Бүтүн Арассыыйатааҕы биэрэпис алтынньы 15 күнүгэр саҕаламмыта.

Ааспыт биэрэпис кэнниттэн мунньуллубут саҥа дааннайдары түмэр судаарыстыба таһымыгар суолталаах тэрээһин кэлэр 10 сылга национальнай бырайыактары анаарарга, социальнай бырагыраамалары чопчу тиэрдэргэ, нэһилиэнньэ олоҕун тупсарыыга туһалаах буолуоҕа.

Атырдьах ыйыгар Алдан улууһун ыраах сытар сэлиэнньэлэригэр – Чагдаҕа, Угайааҥҥа, Кутанаҕа биэрэпис эрдэттэн ыытыллыбыта. Бу муниципальнай тэриллиилэргэ 915 киһи биэрэпистэммитэ.

2021 сыл алтынньы 15 күнүттэн сэтинньи 14 күнүгэр диэри Бүтүн Арассыыйатааҕы биэрэпис сүрүн түһүмэҕэ ааһыаҕа. Биэрэпиһи дьиэттэн тахсыбакка олорон ааһыахха сөп. Биэрэпис үлэһиттэрэ урукку курдук дьиэлэри, кыбартыыралары кэрийэн сурукка киллэриэхтэрэ. Ону таһынан Госуслуги порталга сэтинньи 8 күнүгэр диэри биэрэпискэ кыттыы онлайн-өҥөтө үлэлиэҕэ.

Ону таһынан ый устата Алдаҥҥа, Аллараа Кураанахха, Томмокко стационарнай биэрэпис учаастактара үлэлиэхтэрэ.

Биэрэпис кэмигэр хомуллар информация туора дьоҥҥо көстүбэт, кичэллээхтик харыстанар. Бары дааннайдар эһиги тылгытыттан эрэ хомуллаллар, докумуонунан бигэргэтии ирдэммэт. Туох баар үөскээбит ыйытыылары Алдан улууһугар 3-50-15 билсиэххэ сөп, эбэтэр быһа ситим эрэсиимигэр үлэлиир 8 (800) 707-20-20 нүөмэргэ эрийэн билсиэххэ сөп.

«Саха сирэ» хаһыат, edersaas.ru

Хаартыска sakha.gov.ru

0
0
Telegram @edersaas20