Саҥа дьыллааҕы сүпсүлгэн саҕаланнаҕа, ол кэнниттэн аны бырааһынньыктааҕы уһун сынньалаҥ күннэр кэлиэхтэрэ турдаҕа. Маныаха үчүгэй амтаннаах арыгыны атыылаһан уурунан кэбиһэр бааламмат. Ол эрээри, албын састааптаах («суррогат», контрафактнай) итирдэр утахтары атыылыыр дьоҥҥо түбэһэн эмсэҕэлиир куттал баар.
Итинник албын арыгыттан сүһүрүөххэ, доруобуйаны айгыратыахха, ааһа баран, өлүөххэ да сөбүн иһин ис дьыала уорганнара сэрэтэр тэрээһиннэри ыыталлар. Доруобуйаҕа, олоххо кутталлаах арыгыны булан бохсорго үлэ ыыталлар.
Бу күннэргэ СӨ ИДьМ-тын Экономическай буруйдары уонна хоруупсуйаны утары управлениетын начальнига Владимир Арбузов өрөспүүбүлүкэҕэ арыгылаах бородууксуйаны атыылааһынынан дьарыктанар бөдөҥ атыы-эргиэн ситимнэрин салайааччыларын кытта көрүстэ. Полиция контрафактнай арыгы инфаркт, инсульт курдук ыарыыларга, көрбөт буолууга, өй мөлтөөһүнүгэр уонна да атын куһаҕан, ыарахан содулга тиэрдиэн сөбүн санатар.
Маныаха арыгы атыылаһарга, бу чахчыларга болҕомто уурарга сүбэлииллэр:
*анаан-минээн итирдэр утаҕы атыылыыр маҕаһыыннартан буолбакка, саарбах сирдэртэн, интэриниэтинэн атыылаһыы үчүгэй хаачыстыбаны мэктиэлээбэт.
*сыанатын өйдөөҥ көрүҥ — дьиҥнээх фирменнэй арыгылар сыаналара чэпчэки буолуон сатаммат.
*бытыылка мааркатыгар уонна этикеткэтигэр ыйыллыбыт информация сөп түбэһиэхтээхтэр. Дьиҥнээх акцизнай маарка бэйэтэ килиэйдэнэр кумааҕыга түһэриллэр, ультрафиолет дьайыытыгар ураты өҥнөнөр. Онно оһуордаах голографическай фольга, Российскай Федерация Гербэтэ итиэннэ «РФ» аббревиатура суруллубуттар, кумааҕыга көмүскэллээх сап тиһиллибит.
Өскөтүн албын састааптаах контрафактнай арыгы атыыланар сирдэрин биллэххитинэ, бу нүөмэрдэргэ — 8 (4112) 42-22-22 биитэр 02 (суотабайтан — 102) эрийэн биллэрэргитигэр.
Биһиги корр., «Саха сирэ» хаһыат, edersaas.ru
Хаартыска: интэриниэттэн.