Архитектура уонна тутуу комплексын миниистирэ Павел Аргунов: “Сорох тутааччылар биир кыбартыыраны иккилиитэ-үстүүтэ атыылыыллар. Маннык быһыыга-майгыга түбэспит дьоҥҥо кэлэр 2019 сылга судаарыстыба бүддьүөтүттэн социальнай төлөбүр оҥоһуллуо”, — диир.
Павел Анатольевич бэлиэтииринэн, өрөспүүбүлүкэҕэ кыбартыыраны “хос атыылааһыҥҥа” киирэн биэрбит 40 киһи баар эбит. Маны таһынан 15 өлүүлэһэн туттарааччы харчыларын укпут эбийиэктэрэ Дьокуускай куорат дьаһалтатын быһаарыытынан көтүрүллэн-күрдьүллэн хаалбыт. Итинник уустук балаһыанньаҕа түбэспит дьон холбоон 93,5 мөлүйүөн солкуобай харчыны укпуттар. Өссө тутуута бытааран эбэтэр тохтоон турар 7 эбийиэккэ 377 өлүүлэһэн туттарыы дуогабара оҥоһуллубут. Тутар тэрилтэлэр онуоха “дольщиктар” 1 млрд 46,37 мөл. солкуобайдарын “ыйыстан” кэбиспиттэр.
Саната таарыйа эттэххэ, өрөспүүбүлүкэбит бырабыыталыстыбата өлүүлэһэн тутуу албыннаппыт кыттыылаахтарыгар, барыта 399 киһиэхэ, 2012-2015 сылларга 233,3 мөл. солк. кээмэйдээх социальнай төлөбүрү биэрэн турар. Оннук көмөҕө “Социальнай инициатива”, “Строим вместе”, “Новострой”, “Промстрой-ресурс”, “Эркин-инжиниринг” тутар тэрилтэлэр “дольщиктара” тиксибиттэрэ. Маны тэҥэ олорор дьиэни тутар кэпэрэтииптэр эбийиэктэрин ситэрэллэригэр анаан бүддьүөттэн 45 мөл. солк. кээмэйдээх субсидия бэриллибитин түмүгэр 7 дьиэ тутуута түмүктэнэн, 629 киһи саҥа кыбартыыраҕа көһөн киирдэ. Бырабыыталыстыба өссө бүддьүөт үбүн тардыбакка туран, тутуу хаамыытыгар орооһон, 8 дьиэни (973 кыбартыыраны) ситэртэрдэ.
Василий НИКИФОРОВ, edersaas.ru